भ्रष्टाचारी र तस्करहरु राजनीतिक शक्तिसँग मिलेर मलाई गृहमन्त्रीबाट हटाउने प्रयास गरिरहेका छन् : गृहमन्त्री

२० भदौ, काठमाडौं । उपप्रधान तथा गृहमन्त्री नारायणकाजी श्रेष्ठले आफूलाई गृहमन्त्री पदबाट हटाउने कोसिस भइरहेको बताएका छन् । सरकारले चलाएको भ्रष्टाचारविरोधी अभियानमा आफू कडा रुपमा प्रस्तुत भएकाले अपराधी र तस्करहरू राजनीतिक शक्तिको आडबाट आफूहरूलाई हटाउन लागि परेको दाबी गृहमन्त्री श्रेष्ठले गरेका छन् । 

उनले भ्रष्टाचारको फाइलले गठबन्धनमा पनि कही टकराव देखिएको बतएका छन् । सामूदायिक रेडियो माडीले चितवनमा बुधवार आयोजना गरेको कार्यक्रममा गृहमन्त्री श्रेष्ठले तस्करीलाई कारबाही गर्ने सम्बन्धमा उठका प्रश्नमा आफूले कुनै सम्झौता नगर्ने जिकिर गरे । श्रेष्ठले भ्रष्टाचार, तस्करी, कालोबजारीयाले वर्तमान सरकारलाई अगाडि जानबाट रोक्न खोजिरहेको बताए । 
 
उनले भने, ‘भ्रष्टाचारी, तस्करी, कालोबजारीलाई कारबाही गर्ने सम्बन्धमा केही प्रश्न उठेका छन् । गृहमन्त्री वा सरकार कति टिक्छ भन्ने सवालमा पनि प्रश्न उठेको छ । तस्करी र सरकार सँगसँगै रहन सक्दैन । मूलभूत रूपमा सरकारले कसैसँग पनि सम्झौता गर्दैन । विभिन्न प्रकरणमा जोडिएका व्यक्तिहरूलाई सरकारले कारबाही गरेरै छोड्छ ।’
 
सामाजिक न्यायसहितको आर्थिक समृद्धि नभएसम्म प्राप्त उपलब्धिको रक्षा हुन नसक्ने उनले बताए । नागरिकलाई अनागरिक बनाएर विदेशमा पठाउने कार्यमा राज्यका पदाधिकारी तथा प्रशासनका अधिकारीहरूलाई कारबाहीको दायरामा ल्याइछाड्ने उनले बताए । श्रेष्ठले भ्रष्टाचारमा संलग्न हुनेहरूले एउटाबाट अर्को रूपमा सरकारको अभियानमा असफल पार्ने र यो अभियान सञ्चालन गर्नेहरूलाई घेराबन्दी गर्ने वा सरकारलाई अप्ठ्यारो पार्न खोजिरहेको बताए । 

६० किलो सुन समातेपछि त्यसलाई आधार बनाएर तस्करीको जरैसम्म पुग्ने त्यसको सारा नेटवर्कको पहिचान गरेर कानूनी कारबाही गर्ने प्रक्रियामा अहिले प्रहरी र सिआइबी अनुसन्धानरत रहेको बताए । उनले भने, ‘हामीलाई विश्वास छ केही दिनभित्रै त्यो अनुसन्धान निष्कर्षमा पुग्नेछ । सबै तस्कर र अपराधीहरूलाई कानूनको कठघरमा उभ्याइनेछ ।’