निजामती विधेयकमा ट्रेड युनियनकाे अधिकार यथावत छ : प्रधानमन्त्री

२२ भदौ, काठमाडौं । प्रधानमन्त्री पुष्पकमल दाहाल ‘प्रचण्ड’ले निजामती कर्मचारीसम्बन्धी सरकारले ल्याएको विधेयकमा ट्रेड युनियन व्यवस्थाबारे केही परिवर्तन नगरिएको बताएका छन् ।

निजामती सेवा दिवसका अवसरमा शुक्रबार काठमाडौंमा भएको कार्यक्रमलाई सम्बोधन गर्दै प्रधानमन्त्री प्रचण्डले ट्रेड युनियनसम्बन्धी प्रावधान यथावत रहेको बताए । ‘ट्रेड युनियन अधिकारको कुरा पनि उठ्यो, अहिले भइरहेको व्यवस्थामा केही पनि परिवर्तन गरिएको छैन’ उनले भने । 

संविधान जारी भएको ८ वर्ष बितिसक्दा समेत संघीय कानून नबन्दा निजामती कर्मचारीको संघ, प्रदेश र स्थानीय तहमा कर्मचारी सरुवा, बढुवा, दरबन्दी सिर्जना तथा व्यवस्थापनमा ठूलो समस्या परिरहेको छ । ऐन छिटो ल्याउन सरकारको ध्यानाकर्षण गराउन कर्मचारीहरूले सडक संघर्ष समेत गर्दै आएका छन् ।

बिहीबार बसेको मन्त्रिपरिषद बैठकले संघीय निजामती ऐनका लागि तयार पारेको विधेयकलाई दफावार छलफलका लागि संसदमा पेस गर्ने निर्णय गरिसकेको छ ।