नदीका गिटी बालुवा उत्खनन गर्न दिनुपर्ने पक्षमा उभिए पूर्वाधार विकास समितिका सभापति सिंह

२५ भदौ, काठमाडौं । राष्ट्रिय प्रजातन्त्र पार्टी (राप्रपा)का सांसद दीपकबहादुर सिंहले नदी र खोलाका गिट्टी बालुवा उत्खनन गर्न दिनुपर्ने पक्षमा मत राखेका छन् । संसदको विषयगत समिति पूर्वाधार विकास समिति सभापति समेत रहेका दीपकबहादुर सिंहले नेपालका नदी तथा खोलाबाट गिटी, बालुवा र ढुङ्गा उत्खनन बेलैमा नगरिए बगेर भारत पुग्ने बताए । 

सोमबार काठमाडौंमा आयोजित छलफल कार्यक्रममा सिंहले खोला, नदी मात्र नभई क्रसर उद्योग सञ्चालनको लागि आवश्यक परे चुरेबाट सुरक्षित तवरले गिटी, बालुवा र ढुङ्गा उत्खनन गर्न रोक्न नहुने बताए । 

सरकारले हरेक वर्ष ल्याउने बजेटमा चुरे उख्खनन्मा बल पुग्ने गरी भाषण समेट्दै आएको छ । तर चुरे भत्काए मधेश मरुभूमि बन्ने र तराई क्षेत्रका बासिन्दा संकटमा पर्ने भन्दै चुर् संरक्षण अभियान नै चलाउँदै आएका छन् । सिंह माओवादी केन्द्रको भाग परेको समितिमा सभापति बनेका हुन् । सिंह स्वयम् ठेकेदारी भूमिकाबाट राजनीतिमा आएका हुन् ।