नेम्वाङको पार्थिव शरीरमा पूर्वराष्ट्रपति भण्डारीले ओढाइन् राष्ट्रिय झण्डा

२६ भदौ, काठमाडौं । एमाले उपाध्यक्ष सुवासचन्द्र नेम्वाङको पार्थिव शरीरमा राष्ट्रिय झण्डा पूर्वराष्ट्रपति विद्यादेवी भण्डारीले ओढाएकी छन् । श्रद्धाञ्जलीका लागि पार्टी केन्द्रीय कार्यालय ललितपुरको च्यासलमा राखिएको पार्थिव शरीरमा पूर्वएमाले नेतृ समेत रहेकी भण्डारीले मंगलबार राष्ट्रिय झण्डा ओढाएर श्रद्धाञ्जली अर्पण गरेकी छन् ।

नेम्वाङको पार्थिव शरीरमा एमाले पार्टीकाे झण्डा भने अध्यक्ष केपी शर्मा ओलीले ओढाएका छन् । हृदयघात भएर सोमबार राति निधन भएका नेम्वाङको शव श्रद्धाञ्जलीका लागि पार्टी कार्यालयमा राखिएको छ ।

प्रधानमन्त्री, मन्त्री, विभिन्न राजनीति दल नेता कार्यकर्ता, बुद्धिजीवि, शुभेच्छुक,ले नेम्वाङको पार्थिव शरीरमा माला र खादा लगाएर श्रद्धाञ्जली दिएका छन् । पार्थिव शरीरलाई श्रद्धाञ्जलीका भोलिसम्म त्यही राखिने र बिहीबार मात्र अन्त्येष्टि गरिने भएको छ ।

राजकीय सम्मानसाथ अन्त्येष्टि गर्ने निर्णय सरकारले गरिसकेकाे छ । अन्त्येष्टिका दिन सार्वजनिक बिदा समेत दिने निर्णय भएकाे छ ।