धरानका उपमेयर बेघाको घर तोडफोड : युवा समूहबीचको ग्याङफाइटको परिणाम !

२७ भदौ, काठमाडौं । मंगलबार साँझ धरानका उपमेयर अइन्द्रविक्रम बेघाको धरान उपमहानगरपालिका–१५ खिरियास्थित निवासमा भएको तोडफोड घटना दुई समूहबीचको ग्याङफाइटको परिणाम भएको प्रारम्भिक अनुमान प्रहरीले गरेको छ । 

साँझ एक हुल युवा प्रवेश गरेर बेघाको घर तोडफोड गरेको थिए र उनका भाइ विष्णुमाथि  कुटपिट गरेका थिए । समूहमा रहेका केही युवाले धारिलो हतियारसमेत प्रहार गरेको पीडित पक्षको आरोप छ । 

घटनापछि पुगेको प्रहरीको टोलीले घटना दुई समूहका युवाहरुबीचको ग्याङ फाइटको परिणाम भएको पाइएको जनाएको छ । घटनामा कुनै राजनीतिक, सामाजिक कारण नरहेको प्रहरुीले जनाएको छ । प्रहरीले दुई युवा समूहका गरी ८  जनालाई हिजै पक्राउ गरेर अनुसन्धान जारी राखेको छ । पक्राउ पर्नेमा विष्णु बेघावाई पनि पक्राउ गरिएको छ । तोडफोड भएपछि बेघाले नै प्रहरीलाई खबर गरेका थिए ।

दिउँसो बेघा सहितको युवा समूहले धरान १५ सूर्यबस्तीका सन्देश राईमाथि कुटपिट गरेको र त्यसपछि बदलामा बेलुका घरैमा पुगेर अर्को समूहले आक्रमण गरेको पाइएको छ । 

घटनालाई राजनीतिक वा जाति विशेषको रङ नदिन पनि प्रहरीले आग्रह गरेको छ । माओवादी केन्द्रबाट उपमेयरमा निर्वाचित बेघामाथि राजनीतिक प्रतिशोधको आरोप लगाइएको छ ।