विमानस्थल भन्सारका कर्मचारीले स्थगित गरे आन्दोलन

२७ भदौ, काठमाडौं । त्रिभुवन विमानस्थल भन्सार कार्यालयका कर्मचारीहरुले आन्दोलन स्थगित गरेका छन् । प्रहरीको केन्द्रीय अनुसन्धान ब्युरोले ६० किलो सुन तस्करी प्रकरणको अनुसन्धान सकेर जिल्ला सरकारी वकिलको कार्यालय काठमाडौंमा अनुसन्धान प्रतिवेदन बुझाएसँगै उनीहरुले आन्दोलन रोकेका हुन् । 

उनीहरुले नियमित काम सुरु गरेका छन् । सुन तस्करी प्रकरणमा प्रहरीले अनवाश्यक दुःख दिएको भन्दै दुःख दिने काम बन्द हुनुपर्ने र पक्राउ परेका कर्मचारीहरुलाई रिहा गर्नुपर्ने मागसहित भदौ २५ र २६ गते कार्गो जाँचपासका काम ठप्प पारेका थिए । २७ गतेसम्म पनि माग पूरा नभए भन्सारबाट हुने सबै काम र यात्रु जाँचपपास समेत ठप्प पार्ने चेतावनी दिएका थिए । तर प्रहरीले २७ नै प्रकरणमाथि अनुसन्धान सकेर प्रतिवेदन जिल्ला सरकारी वकिलको कार्यालयमा बुझाएपछि आन्दोलन औचित्यहीन बन्न पुगेको थियो ।

वकिलको कार्यालयले आइतबार २९ जनाविरुद्ध जिल्ला अदालत काठमाडौंमा मुद्दा चलाउने भएको छ । प्रकरणमा भन्सारका मात्रै ८ जना कर्मचारी पक्राउ परेका छन् । पक्राउपछि भन्सारतर्फका १३५ कर्मचारीले सामूहिक सरुवाको माग गर्दै विमानस्थल भन्सार कार्यालय गौचरमा निवदेन समेत थिएका थिए । त्यसको पनि सुनवाइ नहुँदै उनीहरु काममा फर्किएका हुन् ।

गत २ साउनमा विमानस्थलबाट माेटरसाइकलकाे ब्रेकसुमा ६० किलो सुन लुकाई तस्करी गरेको घटनामा प्रहरीले ९ विदेशीसहित ३२ जनलाई पक्राउ गरेर हिरासतमा राखेको छ । प्रकरणमा ५० जनालाई प्रतिवादी बनाइएको छ । १८ जना फरार सूचीमा छन् ।