वीरगञ्जमा डेङ्गी नियन्त्रण अभियान : बाहिरबाट आएका ८२ वटा बसमा गरियो स्प्रे

३० भदौ, वीरगञ्ज । पछिल्लो समय बढ्दै गएको डेङ्गीको संक्रमण नियन्त्रणका लागि वीरगञ्ज महानगरपालिकाले डेङ्गीको संक्रमण सार्ने लामखुट्टे र त्यसको लार्भा नष्ट गर्ने अभियानलाई तीब्रता दिएको छ । यसै क्रममा महानगरपालिकाले डेंगु संक्रमण नियन्त्रणका लाागि विभिन्न स्थानमा स्प्रे गर्ने अभियानपनि चलाइरहेको छ । बाहिरबाट वीरगन्जमा आउने यात्रु वाहक बसमा समेत महानगरपालिकाले स्प्रे गर्न थालेको छ ।

महानगरको स्वास्थ्य महाशाखाका प्रमुख अनिल यादवका अनुसार , शनिबार बिहान मात्रै बाहिरबाट वीरगञ्ज आएका ८२ वटा बसमा स्प्रे गरिएको छ । महानगरको स्वास्थ्य महाशाखासँगै सरसफाइ शाखाका र नगर प्रहरीको टोली स्प्रेका लागि परिचालन गरिएको महानगरको सरसफाइ शाखाका प्रमुख सर्फुदिन मियाँले बताए ।

यसका साथै वीरगन्जको बाइपास सडकस्थित बोलबम पेट्रोल पम्पदेखि नृसिंह माविसम्म रहेका टायर पसलमा राखिएका टायरभित्र जमेको पानीमा रहेका लामखुट्टेको लार्भा नष्ट पनि गरिएको मियाँले जानकारी दिए ।

वीरगञ्ज महानगरका मेयर राजेशमान सिंहको निर्देशनमा भदौ २६ गतेदेखि सुरू भएको ‘सर्च एण्ड डिस्ट्रोय’ अभियान अन्तर्गत शनिबार बिहानसम्म ५ सय ६३ वटा टायरको लार्भा नष्ट गरिएको मियाँले बताए ।

मानिसको अत्यधिक भीडभाड हुने सार्वजनिक स्थानमा पनि कीटनाशक औषधी स्प्रे गर्ने क्रमलाई महानगरले निरन्तरता दिएको उनले बताए । शनिबार बिहान जिल्ला प्रशासन कार्यालय पर्सामा पनि स्प्रे गरिएको उनले जानकारी दिए ।