एसएसपी पाललाई कारबाहीको सिफारिसमा प्रहरीकाे कानुन विभागले आलटाल गर्दै

३१ भदाै, काठमाडौं । नेपाल प्रहरीमा तीन महिनाअघि निलम्बनमा परेका प्रहरी  वरिष्ठ उपरीक्षक (एसएसपी) योगबहादुर पाललाई कारबाहीको सिफारिस भएपनि प्रहरी कै कानुन विभागले आलटाल गरेको छ । महिला सहकर्मीलाई  यौनहिंसा गरेको ठहर गर्दै उनलाई दुई साता अघि नै कारबाहीको सिफारिस गरिएको थियो ।

सो विषयमा छानविन गर्न बनेको समितिले महिला हिंसा गरेको  ठहर गर्दै प्रहरी महानिरीक्षक वसन्त कुँवरलाई प्रतिवेदन बुझाइसकेको छ । प्रहरी महानिरीक्षकसहितको एउटा टोली अहिले कोरिया भ्रमणमा रहेको छ । सो टोली अबको ५ दिनपछि मात्रै नेपाल आइ पुग्नेछ । महानिरीक्षक नेपाल आएपछि मात्रै कारबाही प्रकृया अघि बढ्ने बताइएको छ ।

प्रहरी प्रधान कार्यालयका प्रहरी नायव महानिरीक्षक (डीआईजी) सुरेन्द्र मैनाली नेतृत्वको छानविन समितिले एससएपी पालले यौनहिंसा गरेको निष्कर्ष निकाल्दै प्रतिवेदन बुझाइसकेको प्रहरी प्रधान कार्यालय स्रोतले जनाएको छ ।

सो प्रतिवेदन अहिले प्रहरी प्रधान कार्यालयको कानुन शाखामा पुगेको छ । कानुन शाखाले प्रतिवेदन अध्ययन गरिसकेपछि बल्ल पालमाथिको कारबाही प्रक्रिया अघि बढ्ने बताएर प्रकृया नै अघि बढाएको छैन । ‘डीआईजी मैनालीले प्रतिवेदन बुझाएको दुई साता भयो तर अझै कारबाहीको प्रकृया अघि बढेको छैन’, प्रहरी प्रधान कार्यालय स्रोतले भन्यो । छानबिन समितिले प्रहरी आचारसंहिता तथा प्रहरी नियमावली विपरितको काम गरेको, आफ्नै सहकर्मी महिलालाई यौनहिंसा गरेको पुष्टि भएको कुरा प्रतिवेदनमा उल्लेख गरेको छ ।

आफ्नै सहकर्मी महिलामाथि कार्यकक्षमै यौनहिंसा गरेको पुष्टि भएपछि बर्खास्तसम्मको प्रस्ताव गर्दै प्रतिवेदन पेस गरिएको छ । छानविनको क्रममा विभिन्न व्यक्तिसँग सोधपुछ गर्दा तथा पीडित स्वयं महिलासँग सोधपुछ गर्दा यौन हिंसा गरेको पुष्टि भएको समितिले उल्लेख गरेको छ ।  समितिले गरेको ३ महिना लामो अनुसन्धानका क्रममा यौन हिंसाको पुष्टि गरेको हो । सुदूरपश्चिमको महेन्द्रनगर स्थित प्रहरी कार्यालयमा कार्यरत एसएसपी पालले बिदा मागेकी एक महिला सहायक हवल्दारलाई यौन दुर्व्यवहार गरेका थिए ।

घटनाक्रम अनुसार एक महिला हवल्दार गत जेठ १९ मा घर बिदा स्वीकृत गराएर बिदामा बस्न लागेकी थिइन् । बिदा स्वीकृत गरेर कार्यालय प्रमुख रहेका एससएपी पाललाई जानकारी गराएपछि उनले आफ्नै कार्यालयमा बोलाएर दुर्व्यवहार गरेका थिए । बिदा स्वीकृत भएको जानकारी पाएपछि एसएसपी पालले सञ्चार सेटमै ती महिला हवल्दारलाई आफूलाई भेट्न पठाइदिनु भन्दै आदेश दिएको र क्वार्टरमा आएपछि दुर्व्यवहार गरेका थिए । सञ्चार सेटमा खबर पाएपछि ती महिला कर्मचारी एसएसपी बसेको क्वार्टरमा पुगेकी थिइन् । क्वार्टरमा एसएसपीले महिला हवल्दारलाई भनेका थिए, ‘तिमी मलाई मन पर्यो, आज गुड फ्राइडे मनाऔं ।’

एसएसपीले यस्तो प्रस्ताव गरेपछि ती महिलाले प्रतिवाद गरेकी थिइन । त्यसबारे ड्युटी अफिसरलाई जानकारी गराएकी थिइन् । पछि उनले प्रदेश प्रहरी कार्यालयमा उजुरी गरेपछि मात्रै घटना बाहिर आएको थियो । त्यसपछि प्रदेश प्रहरी कार्यालय धनगढीले एसपी श्यामसिंह चौधरीको नेतृत्वमा समिति गठन गरेर छानबिन प्रक्रिया अघि बढाएको थियो । प्रहरी प्रधान कार्यालयले अपराध अनुसन्धानका विभागका डीआईजी सुरेन्द्र मैनालीको नेतृत्वमा समिति बनाएर छानबिन प्रक्रिया अघि बढाएको थियो ।

हाल उनी निलम्बनमै रहेका छन् । मैनालीको नेतृत्वमा समिति बनेपछि एसपी र एक महिला डीएसपीलाई दुई साता अघि घटनाबारे बुझ्न महेन्द्रनगर पठाइएको थियो । राष्ट्रिय अनुसन्धान विभाग (राअवि)मा बाट नेपाल प्रहरीमा सेवा परिवर्तन गरेका पाल महानगरीय प्रहरी वृत्त बौद्धमा कार्यरत रहँदा कारबाहीमा परेका थिए । यसबाहेक सोलुखुम्बुको इन्चार्ज भएको बेलामा त पालमाथि गम्भीर आरोप नै लागेको थियो । धादिङमा हुँदा पनि उनी विवादमा आएका थिए ।