कांग्रेसले संविधानसभा अध्यक्षको निधनका कारण रोकिएको बीपी साहित्य महोत्सव असोज ३ गते गर्ने

१ असोज, काठमाडौं । नेपाली कांग्रेसले रोकिएको बीपी साहित्य महोत्सवका बाँकी कार्यक्रम यही असोज ३ गते गर्ने भएको छ । भदौ २४ र २५ गतेका कार्यक्रम भने सम्पन्न भइसकेका छन् । संविधानसभा अध्यक्ष सुवास नेम्वाङको निधनका कारण २६ गतेका सबै कार्यक्रम रोकिएका थिए । भदौ २६ गते रोकिएका साहित्य महोत्सवका सबै कार्यक्रम ३ गते गर्ने कांग्रेसले जनाएको छ । 

महोत्सव आयोजक कमिटीको बैठकले महोत्सवको समापन सभा ३ गते गर्ने निर्णय भएको कांग्रेस प्रचार विभाग प्रमुख मीन विश्वकर्माले बताए । यस अघि बनाएको तालिका अनुसारका सबै कार्यक्रम ३ गते नै छ । साे दिन बीपीको समाजवादी कल्पनामा शिक्षा, समावेशीता, सामाजिक रुपान्तरण र बीपी, समय र सबाल्र्टन, बीपीका अख्यानमा नारी, परिवारले बुझेका बीपी र बीपीको विचार, आजको संविधान र अबको बाटो बारेमा सेक्सन वाइज छलफल हुने कार्यक्रमका मिडिया संयोजक इन्द्र रिजालले बताए ।

 साँझ सांस्कृतिक कार्यक्रमहरू पनि राखिएका छन् । प्रमुख मीन विश्वकर्माका अनुसार स्थगित भएको तेस्रो र अन्तिम दिन (भाद्र २६ गते) को कार्यक्रम संविधान दिवसको अवसरमा असोज ३ गते बिहान १०ः ३० बजेदेखि साँझ ५ः०० बजेसम्म पार्टीको केन्द्रीय कार्यालयमा आयोजना हुनेछ । गत साउनमा बसेको केन्द्रीय समितिको बैठकको निर्णय अनुसार कांग्रेसले २४ गतेदेखि २६ गतेसम्म पार्टी मुख्यालयमा महोत्सवको आयोजना गरेको थियो ।
 
अन्तिम दिनको कार्यक्रममा सहभागिताका लागि राजनीतिक दल नेता,  लेखक, साहित्यकार, बुद्धिजीवी, अध्येता, अनुसन्धाता एवं  सामाजिक, सांस्कृतिक क्षेत्रमा रुची राख्ने सम्पूर्ण  अनुरोध गरेको छ । अन्तिम दिनको कार्यक्रम सभ्य र भव्य बनाउन कांग्रेसका सबै भातृ संगठनहरु पनि परिचालित हुने बताइएको छ ।