विद्यालय शिक्षा विधेयक सबै पक्षसँग छलफल गरेरै ल्याएका हौं : रक्षामन्त्री खडका

२ असोज, काठमाडौं । कार्यवाहक प्रधानमन्त्री समेत रहेका रक्षामन्त्री पूर्णबहादुर खडकाले सरकारले सरोकारवाला सबै पक्षसँग छलफल गरेरै विद्यालय शिक्षा विधेयक ल्याएको बताएका छन् । 

शिक्षा, विज्ञान तथा प्रविधि मन्त्रालयले ‘राष्ट्रिय शिक्षा दिवस २०८०’को अवसरमा मंगलबार काठमाडौंमा आयोजना गरेको ‘मूल समारोह’लाई सम्बोधन गर्दै सरकारले विधेयकलाई सबैसँग छलफल, अन्तरक्रिया गरेर नै ल्याएको बताए । उनलेसंघीय लाेकतान्त्रिक गणतन्त्र नेपालकाे संविधानले परिकल्पना गरेकाे शैक्षिक व्यवस्थाकै आधारमा विधेयक तयार भएकाे बताए ।

मन्त्री खडकाले विधेयकको मस्यौदा बन्ने क्रममा प्रधानमन्त्री प्रचण्डको पहलमा विभिन्न समयमा विभिन्न पक्ष, शैक्षिक संघ-संस्थासँग घुनिभूत छलफल भएको र त्यसबाट प्राप्त सल्लाह-सुझावलाई मूल आधार बनाएर विधेयक तयार पारी संसदमा दर्ता गराएको स्पष्ट पारे । 

उनले विधेयक छलफलकै क्रममा रहेको र त्यसमा सुधार नगरी नहुने विषय भएमा सुधार गरेर अगाडि बढ्न सरकार तयार रहेको उनले बताए । संघर्ष र सडकमा गएर समस्याको समाधान खोज्न नहुनेमा उनले जोड दिए । ‘विधेयक संसदमा दर्ता भएयता कसै वा कुनै पक्षबाट पनि यो चाहिं बुँदामा असहमति छ भनेर आएकाे छैन’ मन्त्री खडकाले भने, ‘तर भोलि असोज ३ गते संविधान दिवसका दिन विद्यालयहरुले कक्षा बन्द गर्ने घोषण गरेको कुरा संचारमाध्यमबाट आइरहेका छन्, त्यो राम्रो होइन । विधेयकमा कुनकुन बुँदामा विरोध हो, ठोस गरेर आउनुस, सरकार छलफल गर्न तयार छ । पठनपाठन बन्द फिर्ता लिनुस् ।’

सरकारले विधेयकलाई दफावार छलफलका लागि संघीय संसदको तल्लो सदन प्रतिनिधिसभामा दर्ता गरिसकेको छ । संसदले पारित गरेर थप छलफलका लागि विषयगत समितिमा पठाइनेछ । शिक्षकले दोहोरो पेसा गर्न नपाइने, राजनीतिक दलका सदस्यता लिन बन्देज, विभिन्न व्यवसाय, व्यापार गर्न रोक लगाउने लगायत विधेयकमा राखिएका विभिन्न बुँदामा विद्यालय शिक्षकहरुले विरोध जनाउँदै आइरहेका छन् । विरोधमा उनीहरुले भोलि बुधबार देशभरका विद्यालयहरुमा पठनपाठन गर्ने र काठमाडाैंमा प्रदर्शन गर्ने घोषणा गरेका छन् ।