काठमाडाैंमा एमालेको संविधान उत्सव, चुच्चे नक्सा र राष्ट्रिय झण्डा राखेर सेल्फी

३ असोज, काठमाडौं । प्रमुख प्रतिपक्षी नेकपा (एमाले)ले बुधबार संविधान दिवसको अवसरमा काठमाडौंको नारायणचौरमा विशेष कार्यक्रम आयोजना गरेको छ । बिहान ७ बजे नारायणचौरमा पुगेर अध्यक्ष केपी शर्मा ओली, नेता–कार्यकर्ताहरुले हातहातमा राष्ट्रिय झण्डा र चौंरमा नेपालको नक्सा राकेर दिवसमा शुभकामना आदनप्रदान गरे । 

चौंरमा अग्लो खम्बामा राष्ट्रिय झण्डा समेत फहराउने काम भएको छ । सहभागीहरुले राष्ट्रिय झण्डासँग सेल्फी खिचेका छन् । एमालेले आज  ‘मर्निङ वाक नेसनल वाक, सेल्फी विथ नेशनल फ्ल्याग’सहित संविधान दिवस मनाउन आग्रह गरेको छ । कार्यक्रममा एमालेका पदाधिकारी, काठमाडौं महानगरपालिकाका उपप्रमुख सुनिता लगायत नेताहरु सहभागी भए । संविधान दिवस राष्ट्रिय दिवस भएको उल्लेख गर्दै ओलीले सहभागीहरुलाई शुभकामना दिए । धर्मपत्नी राधाकासाथ पुगेका उनले चाैंरमा राखिएका चुच्चे नक्स, राष्ट्रिय झण्डा र विकास-समृद्धिका नारासहितका व्यानरमा सहभागीहरुसँग सेल्फी खिचाएका छन् ।

यता सरकारले आज बिहान सैनिक मञ्च टुँडीखेलमा विशेष समारोहको आयोजना राष्ट्रपति रामचन्द्र पौडेलको समुपस्थितिमिा विशेष कार्यक्रम मनाएको छ । यस वर्ष असोज ३ को संविधान दिवसलाई ३ दिनसम्म कार्यक्रम गरी मनाउने निर्णय मन्त्रिपरिषदले गरेको थियो ।

वर्तमान संविधान २०७२ असोज ३ मा जारी भएको थियो । २०६४ मा गठित संविधानसभाबाट संविधान बनाउन नसकेपछि २०७० मा भएको दोस्रो संविधानसभाको चुनाव गराएपछि गठिन संविधानसभाले संविधान बनाएको थियो ।