कोशीको राजनीति गम्भीर मोडमा पुगेको छ : मुख्यमन्त्री कार्की

३ असोज, काठमाडौं । कोशी प्रदेशका मुख्यमन्त्री हिक्मतकुमार कार्कीले वर्तमान संविधानमा नागरिकका अधिकार स्थापित भएका बताएका छन् । संविधान दिवसको अवसरमा आज कोशी प्रदेश सरकारद्वारा मुख्यमन्त्री तथा मन्त्रिपरिषद्को कार्यालय परिसरमा आयोजित ‘संविधान दिवस २०८०’ मूल समारोहलाई सम्बोधन गर्दै सो कुरा बताएका हुन् ।

मुख्यमन्त्री कार्कीले नेपालको वर्तमान संविधान सबैको साझा दस्ताबेज भएको र यसमा नागरिकका सबै अधिकार स्थापित भएको दाबी गरे ।  उनले कोशी प्रदेशको राजनीतिक अवस्था अहिले गम्भीर मोडमा रहेको बताउँदै लोकतान्त्रिक गणतन्त्रात्मक व्यवस्थाप्रति वितृष्णा फैलिन नदिन राजनीतिक दलहरु गम्भीर भएर सोच्नुपर्ने धारणा राखे ।

‘हाल कोशी प्रदेशमा देखिएको राजनीतिक अस्थिरताले सिङ्गो प्रदेशवासीहरुमा संघीयताप्रति वितृष्णा पैदा  भएको छ,’ उनले भने, ‘यस विसम परिस्थितिमा जनभावानालाई बुझेर अघि बढ्न प्रदेश सभामा प्रतिनिधित्व गर्ने सम्पूर्ण राजनीतिक दलहरुलाई आव्हान गर्दछु ।’ 

उनले संविधानमा स्थापित नागरिक अधिकारलाई कार्यान्वयन गर्न स्थापना भएको संघीयतालाई बलियो बनाउनुपर्ने धारणा राख्दै लोकतन्त्र स्थापनाका लागि ज्यान अर्पण गर्ने सहिदहरुप्रति श्रद्धाञ्जली व्यक्त गरे । घाइतेहरुको शीघ्र स्वास्थ्य लाभको कामना गरे ।