१२ करोडको सीमा हटाउन राष्ट्र बैंकका गभर्नरले लचकता देखाएसँगै शेयरबजारमा हरियाली, नेप्सेमा ४४ अंकको बृद्धि

४ असोज, काठमाडौं । नेपाल राष्ट्र बैंकका गभर्नर महाप्रसाद अधिकारले शेयर धितो कर्जामा लचकता अपनाउने जानकारी दिएपछि बिहीबारको शेयरबजारमा उछाल आएको छ । उनले मार्जिन प्रकृतिको सेयर धितो कर्जामा १२ करोडको सीमा हटाउने आश्वासन दिएका थिए । योसँगै बिहीबार शेयरबजारमा हरियाली छाएको छ । मंगलबार बसेको वित्तीय क्षेत्र उच्चस्तरीय समन्वय समितिको बैठकमा गभर्नर अधिकारीले १२ करोडको सीमा हटाउने बताएका थिए ।

लामो समयदेखि सेयर धितो कर्जामा लाग्दै आएको १२ करोडको सीमा हटाउन राष्ट्र बैंकका गभर्नर अधिकारी लचक देखिएपछि शेयरबजार बढेको हो । अर्थमन्त्री प्रकाशशरण महतसँग भएको पटक–पटकको छलफल र लगानीकर्ताहरूको चर्को दवावपछि गभर्नर अधिकारीले यो सीमा हटाउने बताएका थिए । राष्ट्र बैंकले निर्देशिकामार्फत यो व्यवस्था हटाउन लागेको छ । वित्तीय क्षेत्र उच्चस्तरीय समन्वय समितिसमक्ष पनि शेयरबजारलाई खुला गर्ने प्रतिबद्धता गभर्नरले जनाएका थिए । 

मंगलबार समितिको बैठकमा गभर्नर अधिकारी र अर्थमन्त्री महतबीच शेयर धितो कर्जामा लाग्दै आएको १२ करोडको सीमामा पुनरावलोकन गर्ने सहमति जुटेको थियो । समग्र बजेट कार्यान्वयन गरी अर्थतन्त्रलाई कसरी चलायमान बनाउने विषयमा भएको छलफलमा शेयर धितो कर्जाको सीमा हटाउने विषयलाई प्राथमिकता दिइएको थियो । छलफलमा सहभागी एक अधिकारीले गभर्नरले तुरुन्तै यसलाई पुनरावलोकन गर्ने जानकारी छलफलमै दिएको बताएका थिए । पछिल्लो समय शेयरबजार घट्दो क्रममा रहँदा शेयर धितो कर्जामा लगाइएको १२ करोडको सीमा हटाउन राष्ट्र बैंकलाई निकै दवाव परेको थियो । 

सरकारले घरजग्गाको कित्ताकाट खुकुलो बनाएसँगै लगानीकर्ताहरूले शेयरबजारलाई पनि खुकुलो बनाएर जानुपर्नेमा जोड दिँदै आएका थिए । मौद्रिक नीतिमार्फत नै यसलाई हटाउनका लागि राष्ट्र बैंकलाई दबाब थियो । तर, मौद्रिक नीतिले त्यसलाई सम्बोधन गरेन । पछिल्लो समय अर्थमन्त्री महतले ब्याजदर र शेयर बजारसम्बन्धी नीतिमा गभर्नरसँग निरन्तर छलफल गर्दै आइरहेका थिए । लगातारको छलफलपछि गभर्नर अधिकारीले यस नीतिमा लचक हुने जनाउ दिएका थिए । 

शेयर लगानीकर्ताले व्यक्तिगत रुपमा १२ करोडको सीमा पर्याप्त रहेपनि शेयर बजारमा लगानी गर्ने उदेश्यले आएका कम्पनीमा उक्त सीमा व्यवहारिक नभएको बताउँदै आएका थिए । सबै क्षेत्रबाट आलोचनको विषय भएपछि १२ करोडको सीमा हटाउन तयारीसँगै शेयरबजारमा हरियाली छाएको हो ।

साताको अन्तिम कारोबार दिन बिहिबार बजार परिसूचक नेप्से ४४.३४ अंकले वृद्धि हुँदा २०२९.७८ को विन्दुमा पुगेको छ । आइतबार ४२.१४ अंकको उच्च गिरावट भएको नेप्से सोमबार र मंगलबार भने बढेको थियो ।  मंगलबार १९८४.४३ को विन्दुमा बन्द भएको नेप्से बिहीबार २.२३ प्रतिशतले बढेर बन्द भएको हो ।

हाइड्रोपावर कम्पनीको शेयर मूल्यमा उच्च वृद्धि हुँदा बिहीबार नेप्से पनि बढेको हो । नेप्सेका सबै उपसूचकमा वृद्धि हुँदा हाइड्रोपावर उपसूचक ५.३१ प्रतिशतले बढेको छ । यस्तै वित्त कम्पनी उपसूचक ४.३८ प्रतिशत र विकास बैंक उपसूचक ३.७७ प्रतिशतले वृद्धि भएको हो ।