रास्वपाले सम्झायाे आन्दोलनरत शिक्षकहरूलाई विद्यार्थीको पढ्न पाउने अधिकार

४ असोज, काठमाडौं । प्रतिपक्षी दल राष्ट्रिय स्वतन्त्र पार्टी (रास्वपा)ले आन्दोलनरत शिक्षकहरुलाई विद्यार्थीको पढ्न पाउने अधिकार कुण्ठित नगर्न ध्यानाकर्षण गराएको छ । शिक्षा विधेयकको विरोधमा देशभरका सामुदायिक विद्यालयका शिक्षकहरू पठनपाठन ठप्प पारेर काठमाडौंमा सडक आन्दोलनमा उत्रिएपछि रास्वपाले विद्यार्थीको अधिकारबारे स्मरण गराएको हो । 

पार्टीका महासचिव मुकुल ढकालले आज एक प्रेस विज्ञप्ति निकालेर शिक्षकहरूको जायज मागहरुबारे संवेदनशील रहेको जनाउँदै उचित माग सम्बोधन गर्नुपर्नेमा जोड दिएका छन् । उनले माग पूरा गराउनवैकल्पिक विधिहरू भएको र विद्यार्थीहरूको पढ्न पाउने अधिकारलाई कुण्ठित गर्न नहुने बताए । 

शिक्षा मन्त्री अशोक राईले गत बुधबार संसदमा दर्ता गराएको विधेयकका राखिएका केही बुँदाप्रति असहमति जनाउँदै नेपाल शिक्षक महासंघको नेतृत्वमा सामुदायिक विद्यालयका शिक्षकहरू काठमाडौंमा बुधबारदेखि सडक आन्दोलनमा छन् । माग पूरा नभएसम्म सडक नछाड्ने र जिल्ला नफर्कने उनीहरूको अडान छ । 

यसैबीच आजै नेपाली कांग्रेसका महामन्त्री एवं सांसद गगनकुमार थापाले विधेयक संसदमा दर्ता भइसकेको र शिक्षकको भावना र पेसागत सुरक्षाको पक्षमा हुने गरी संशोधन गर्ने आश्वासन दिएका छन् । उनले संशोधनबाट सच्याउने प्रतिवद्धता जनाउँदै विद्यालयमा पठनपाठन बन्द नगर्न आग्रह गरेका छन् ।