सुन तस्करीमा पक्राउ परेका विमानस्थल भन्सारका कर्मचारीमाथि भ्रष्टाचार कसुरमा छानबिन गर्न अख्तियारलाई पत्र

५ चैत, काठमाडौं । जिल्ला सरकारी वकिलको कार्यालय, काठमाडौंले त्रिभुवन अन्तर्राष्ट्रिय विमानस्थलबाट भएको ६० किलो सुन तस्करी प्रकरणमा पक्राउ परेका ५ जना भन्सार कर्मचारीलाई भ्रष्टाचारको कसुरमा पनि अनुसन्धान गर्न अख्तियार दुरुपयोग अनुसन्धान आयोगलाई पत्राचार गरेको छ । 

भन्सार कार्यालयमा ६० किलो सुन जाँच पासमा संलग्न जोखिम व्यवस्थापन शाखाका अधिकृत सन्तोष चन्द, भन्सार कार्यालयका भन्सार जाँच पास अधिकृत गणेशप्रसाद पौडेल, नायब सुब्बा विरेन्द्र नेपाली, कुमार ढकाल र एक्स–रे जाँचकी सरोज श्रेष्ठलाई भ्रष्टाचारमा समेत छानबिन गर्नुपर्ने निष्कर्ष कार्यालयले निकालिएको हो । सो आधारमा आयोगलाई पत्राचार गरिएको वकिलको कार्यालयले जनाएको छ । 

सुन तस्करी प्रकरणमा सीआईबीले ५४ दिनसम्म अनुसन्धान गरेर मुद्दा चलाउन बुझाएको प्रतिवेदनका आधारमा वकिलको कार्यालयले ७ चिनियाँसहित २९ जनालाई प्रतिवादी बनाएर जिल्ला अदालत काठमाडौंमा मुद्दा दर्ता गराइसकिएको छ । अहिले अदालतमा प्रतिवादीहरुको बयान लिने सिलसिला जारी रहेको छ ।