आन्दोलनरत शिक्षकहरूसँग वार्ता आजै टुंग्याउने सरकारकाे तयारी

५ असोज, काठमाडौं । कार्यवाहक प्रधानमन्त्री तथा रक्षामन्त्री पूर्णबहादुर खड्काले आन्दोलनरत शिक्षकहरुसँगको वार्ता आजै टुंगाेमा पुर्‍याउने गरी तयारी गर्न सरकारी वार्ता टोलीलाई निर्देशन दिएका छन् ।

कावा प्रम खड्काले शिक्षकसँगको वार्तालाई सकेसम्म आजै टुंगाेमा पुर्‍याउन सरकारी वार्ता टोलीलाई निर्देशन दिएको उनको सचिवालयले जनाएको छ । साेहीअनुरूप वार्ताकाे तयारी भइरहेकाे मन्त्री गुरूङले जनाएका छन् । उनले आफू  वार्ता आजै टुंगाे पुग्नेमा विश्वस्त रहेकाे बताए । औपचारिक वार्ता भने सुरू भइसकेकाे छैन ।

विद्यालय शिक्षासम्बन्धी विधेयकमा भएका कतिपय प्रावधानमा असन्तुष्टि जनाउँदै नेपाल शिक्षक महासंघको नेतृत्वमा ३ दिनदेखि देशभरका समुदायिक विद्यालयका शिक्षकहरुले विद्यालय बन्द गरेर काठमाडौं केन्द्रित विरोध गरिरहेका छन् । यसबाट देशभर लाखौं विद्यार्थीको पढाइ पूर्ण रुपले प्रभावित हुन पुगेको छ । काठमाडौंका यातायात समेत अस्तव्यवस्त बनेको छ ।

सरकारले आन्दोलनरत शिक्षकहरुसँग औपचारिक वार्ता गर्न उपप्रधान एवं गृहमन्त्री नारायणकाजी श्रेष्ठको नेतृत्वमा वार्ता टोली खटाएको छ । श्रेष्ठ नेतृत्वको टोलीमा कानुन, न्याय तथा संसदीय मामिला मन्त्री धनराज गुरुङ, शिक्षा, विज्ञान तथा प्रविधि मन्त्री अशोक राई, सञ्चार तथा सूचना प्रविधि मन्त्री रेखा शर्मा, नेपाल सरकारका मुख्यसचिव बैकुण्ठ अर्याल र विभागीय सचिवलगायत छन् ।

टोलीले बिहीबार दुई चरणमा अनौपचारिक छलफल गरेको थियो । तर सहमतिको संकेत नेदेखिएपछि शिक्षकहरुले आज पनि माइतीघर–नयाँ बानेश्वर क्षेत्रमा प्रदर्शन जारी राखेका छन् । सरकारले संसदमा दर्ता गराएको शिक्षा विधेयकमा समेटिएका शिक्षकविरोधी प्रावधान हटाउने लिखित सहमति नभएसम्म सडक नछाड्ने अडान उनीहरुको छ । आन्दोलनको नेतृत्व नेपाल शिक्षक महासंघ गरिरहेको छ ।

रक्षा मन्त्रालयमा आज बिहान उनले सरकारी वार्ता टोलीका संयोजक उपप्रधानमन्त्री तथा गृहमन्त्री नारायणकाजी श्रेष्ठ,  गरेका थिए ।

आजको बैठकमा शिक्षकका जायज मागहरु सम्बोधन हुने गरी  वार्तालाई सकेसम्म आजै निष्कर्षमा पुर्‍याउने गरी काम गर्ने विषयमा छलफल भएको थियो ।