विद्यार्थीहरुको पढाइ रोकिनु दुःखद् : लोसपा

५ असोज, काठमाडौं । सत्तारुढ लोकतान्त्रिक समाजवादी पार्टी (लोसपा)ले शिक्षकहरुको जारी काठमाडौं केन्द्रित आन्दोलनका कारण देशभरका सामुदायिक विद्यालयहरुको पठनपाठन अवरुद्ध हुनु दुःखद भएको जनाएको छ । उसले आन्दोलनप्रति पार्टीको गम्भी रुपमा ध्यानाकर्षण भएको समेत जनाएको छ ।

लोसपाका अध्यक्ष महन्थ ठाकुरले शुक्रबार विज्ञप्ति निकालेर सरकार र आन्दोलनरत दुवै पक्षलाई विषयमा गम्भीर हुन आग्रह समेत गरे । उनले संघीयताको मर्मलाई आत्मसातगरेर तत्काल सहमतिमा पुगेर पढाइ सुचारु गराउन समेत सरकारको ध्यानाकर्षण गराएका छन् । 

प्रतिनिधिसभामा दर्ता भएको विद्यालय शिक्षा विधेयकप्रति असन्तुष्टि जनाउँदै देशभरका सबै समुदायिक विद्यालयका हजाराैंकाे संख्यामा शिक्षक, शिक्षिका, कर्मचारीहरू विभिन्न १८ बुँदे माग राखेर  बुधबारदेखि विद्यालय बन्द गरेर काठमाडौंमा आन्दोलन गरिरहेका छन् । माग पूरा नभएसम्म आन्दोलन नरोकिने उनीहरुको अडान छ । 

यसैबीच आन्दोलनकारी शिक्षक र सरकारबीच अहिले सिंहदरबारमा वार्ता टोली गठन गरेर औपचारिक वार्ता गरिरहेका छन् । वार्ता आजै टुंगोमा पुग्ने विश्वास दुवै पक्षको छ । मुख्य गरी शिक्षकलाई स्थानीय तहको मातहात राख्नेगरी ल्याएको विधेयकका प्रावधान खारेज हुनुपर्ने माग उठाएका छन् ।