आन्दोलनरत राहत शिक्षकहरूले आज सडकमा सुतेर विरोध जनाउने

८ असोज, काठमाडौं । सरकारले संसमा दर्ता गराएको विद्यालय शिक्षा विधेयकको विरोधमा असोज ३ देखि आन्दोलनरत राहत शिक्षकहरूले आज सडकमा सुतेर विरोध जनाउने भएका छन् । देशभरका ४० हजार राहत शिक्षकहरु आन्दोलनलाई निर्णायक बनाउन काठमाडौं आउने क्रम जारी रहेको बताउने राहत शिक्षक संघले आज शिक्षकहरुलाई सडकमा सुतेर विरोध जनाउने कार्यक्र तय भएको जनाएको छ । 

आन्दोलनमा राहत शिक्षक, बालविकास शिक्षक, पेन्सन वञ्चित शिक्षक, विद्यालयका कर्मचारी सहभागी छन् । उनीहरुले आज दिउँसो माइतीघर मण्डलादेखि नयाँ बानेश्वरको सडक खण्डमा लम्पसार सुतेर विरोध जनाउनेछन् । आन्दोलनको सुरुवातीमा अस्थायी शिक्षकको पनि सहभागिता रहेकामा ५ गते सरकारसँग ६ बुँदे सम्झौता गरेर सडकबाट फिर्ता भइसकेका छन् ।

राहत शिक्षकहरुले सम्झौतामा आफूहरुको माग बेवास्ता गरेर शिक्षक महासंघले गलत सम्झौता गरेको बताउँदै आन्दोलन जारी राखेका हुन् । त्यतिबेला आन्दोलनको नेतृत्व गरिरहेको महासंघले राहत, पेन्सनबाट वञ्चित र बाल शिक्षाका शिक्षक तथा कर्मचारीको मागलाई कुल्चेर सम्झौता गरेर धोका दिएको आन्दोलनकारीहरुको भनाइ छ । 

माग पूरा नभएसम्म सडकबाट फिर्ता नहुने उनीहरुको अडान छ । राहत शिक्षकलाई सत प्रतिशत स्थायीको माग व्यवस्था हुनुपर्ने, कर्मचारीको सेवा सुविधा बढाउनुपर्ने, करार, अनुदानका शिक्षकलाई पेन्सनको व्यवस्था गरिनुपर्ने लगायत माग राख्दै आएका छन् । आज दिउँसो १२ बजे एक घण्टा सडकमा लम्पसार सुतेर विरोध जनाउने कार्यक्रम रहेको नेपाल राहत शिक्षक केन्द्रीय समितिका वरिष्ठ सह–अध्यक्ष नबिनसिंह धामीले बताए ।