हुम्लाकाे हिल्सा-सिमिकोट सडक निर्माण गर्न चीनसँग सम्झाैता

८ असोज, काठमाडौं । प्रधानमन्त्री पुष्पकमल दाहाल ‘प्रचण्ड’ को चीन भ्रमणका क्रममा दुई देशबीच दर्जनभन्दा बढी विषयमा सम्झौता भएका छन् । जसमध्ये हुम्लाको हिल्सा नाका संचालन लागि हिल्सा-सिमकोट सडक निर्माण गर्ने विषय र नेपालको उत्तरी क्षेत्रका जिल्ला उत्पादन र जीवित सामग्रीको प्रमाणपत्र हस्तान्तरण सम्बन्धी पनि सम्झौता भएको छ । 

आज बिहान बेइजिङमा आयोजित सम्झौता समारोहमा प्रधानमन्त्री प्रचण्ड र चिनियाँ समकक्षी लि छ्याङको उपस्थितिमा दुई देशका अधिकारीहरुबीच १२ सम्झौता र समझ्दारी पत्रमा हस्ताक्षर भएको हो । प्रधानमन्त्री प्रचण्ड असाेज १३ गते स्वेदश फिर्ता हुने कार्यतालिका रहेकाे छ ।

दुई पक्षीय सम्झौता र समझ्दारीहरुः

१. राष्ट्रिय योजना आयोग र नेसनल डेभलप्मेन्ट एन्ड रिफर्म कमिसन अफ द पिपल्स रिपब्लिक अफ चाइनाबिच मेमोरेन्डम अफ अन्डरस्ट्यान्डिङ (एमओयू)मा हस्ताक्षर ।
२.  चीन र नेपाल सरकारबिच नेपालको उत्तरी पहाडी क्षेत्रका लागि उत्पादन र जीवित सामग्रीको प्रमाणपत्र हस्तान्तरण ।
३.  डिजिटल अर्थतन्त्रबारे सहकार्य अभिवृद्धि गर्नेबारे नेसनल डेभलप्मेन्ट एन्ड रिफर्म कमिसन र अर्थ मन्त्रालयबिच एमओयूमा हस्ताक्षर ।

४. नेसनल डेभलप्मेन्ट एन्ड रिफर्म कमिसन र वन तथा वातावरण मन्त्रालयबिच हरित र न्यून–कार्बोन विकाससम्बन्धी एमओयू ।

५. सिजाली विद्यालय परियोजनाबारे सम्झौता ।

६. कृषि, पशुपालन र मत्स्यपालनमा सहयकार्य गर्ने विषयमा चीनको कृषि तथा ग्रामिण मामिला मन्त्रालय र नेपालको कृषि तथा पशुपक्षी विकास मन्त्रालयबिच एमओयूमा हस्ताक्षर

७. सन् १९८१ नेपाल–चीन व्यापार र भुक्तानी सम्झौतालाई मूल्याङ्कन र परिमार्जन गर्न एक संयुक्त प्राविधिक कार्यदल बनाउने विषयमा चीनको वाणिज्य मन्त्रालय र नेपालको उद्योग, वाणिज्य तथा आपूर्ति मन्त्रालयबिच एमओयूमा हस्ताक्षर ।

८. नेपालबाट चीनमा जडीबुटीको निर्यात गर्ने विषयमा चीनको जेनेरल एडमिनिस्ट्रेसन अफ कस्टम र नेपालको कृषि तथा पशुपक्षी विकास मन्त्रालयबिच एमओयूमा हस्ताक्षर ।

९. चीनको नेसनल एडमिनिस्ट्रसन एन्ड पब्लिकेसन र नेपालको संस्कृति, पर्यटन तथा नागरिक उड्डयन मन्त्रालयबिच एमओयूमा हस्ताक्षर ।

१०. विज्ञान, प्रविधि र नवीनतामा सहकार्यका लागि चीनको विज्ञान तथा प्रविधि मन्त्रालय र नेपालको शिक्षा, विज्ञान तथा प्रविधि मन्त्रालयबिच एमओयूमा हस्ताक्षर ।

११. मानव श्रोत र विपद् सामग्रीबारे पत्र आदानप्रदान ।

१२. हिल्सा–सिमिकोट सडक परियोजनाबारे सम्झौता ।