सडकमा सुतेर आन्दोलन गरिरहेका शिक्षकका माग सम्बोधन गर्न सरकार तयार छः खड्का

८ असोज, काठमाडाैं । कार्यवाहक प्रधानमन्त्रीसमेत रहेका रक्षा मन्त्री पूर्णबहादुर खड्काले सामुदायिक विद्यालयका आन्दोलनरत राहत र बालविकास (ईसीडी) शिक्षकका माग सम्बोधन हुने बताएका छन् ।

नेपाली कांग्रेसको सोमबार जारी केन्द्रीय कार्यसमिति बैठकमा मन्त्री खडकाले सडक आन्दोलनमा रहेका शिक्षकहरुको माग सम्बोधन गर्न सरकार तयार रहेको बताए । उनले यसअघि नेपाल शिक्षक महासंघ भएको सम्झौता पनि कार्यान्वयन हुने उनको भनाइ थियो । सम्बोधन नियमावली र कार्यविधिमार्फत हुने बताए ।

यही असोज ५ मा महासंघ र सरकारबीच भएको सहमतिप्रति आपत्ति जनाउँदै राहत शिक्षक र ईसीडी शिक्षक आज पनि राजधानी केन्द्रित सडक आन्दोलन जारी राखेका छन् । उनीहरुले आज दिउँसो सडकमा ब्यानर राखेर सुतेर विद्यालय शिक्षा विधेयकमा राखिएका आफूहरुको अधिकार खोस्ने प्रावधानको विरोध गरे । 

सुरुमा सबै सामुदायिक विद्यालयका सबै प्रकारका शिक्षकहरु सम्मिलित आन्दोलन सरकारसँग भएको सम्झौताले आफूहरुको माग सम्बोधन भएको दाबी गर्दै स्थायी शिक्षक आन्दोलनबाट फिर्ता भएपनि राहत र ईसीडीका शिक्षक, कर्मचारी भने सडकमै छन् । माग पूरा नभएसम्म सडक नछाड्ने उनीहरुको अडान छ ।

शिक्षक महासंघले सम्झौतामा आफूहरुको माग समेटिकनै आन्दोलनबाट पछि हटेको भन्दै सम्झौतालाई ‘धोका’ भनेका छन् ।