निगमका लागि जहाज किन्दा ‘खुम्ले किरा’ छिर्न दिन्नौं : मन्त्री किराती

१० असोज, काठमाडौं । संस्कृति, पर्यटन तथा नागरिक उड्डयनमन्त्री सुदन किराँतीले नेपाल वायुसेवा निगमका लागि जहाज खरिद गर्दा कुनै किसिमबाट भ्रष्टाचार हुन नदिने प्रतिवद्धता जनाएका छन् । 

बुधबार पर्यटन दिवसको अवसरमा ललितपुरमा आयोजित कार्यक्रममा उनले जहाज किन्दा कुनै भ्रष्टाचार हुन नदिने प्रतिवद्धता जनाएका हुन् । उनले निगममा अझै विकृत र विसंगति बाँकी रहेको बताउँदै त्यसबीचमा पनि पारदर्शी ढंगले जहाज किन्ने बताए । निगमको जहाज खाने ‘खुम्ले किरा’ अझै बाँकी यताकता बाँकी रहेको बताउँदै जहाज खरिदमा त्यसलाई छिर्न नदिने बताए । मन्त्री किरातीले भ्रष्टाचारीलाई ‘खुम्ले किरा’ संज्ञा दिँदै आइरहेका छन् । निगमले आन्तरिक २ वटा जहाज किन्ने तयारी गरेको छ । 

उनले नेपाली आकाशलाई कालोसूचीबाट हटाएर युरोपियन पर्यटकको विश्वसनीय गन्तव्य बनाउने पनि बताए । कालोसूचीलाई हटाएर पर्यटकलाई विश्वसनियता बनाउन ठोस काम भइरहेको र छिट्टै परिणाम देखिने बताए । हवाई क्षेत्रमा नीतिगत र संरचनागत सुधार आवश्यक रहेको उनको भनाइ थियो । 

यसअघि मन्त्री किराती ‘यसअघिका मन्त्री र निगम प्रमुख सबैका आँखा जहाजको पांग्रामा मात्र पर्ने गरिएको भनेर चर्चामा आएका थिए । त्यस्ता आँखा भएकालाई निगममा प्रवेश नै नदिने उनले बताउँदै आएका छन् ।

तत्कालीन कांग्रेस नेतृत्वकाे सरकार र पर्यटन मन्त्रीकाे कार्यकालमा वाइड बडी जहाज खरिद गर्दा अर्बाैं रूपैयाँ भ्रष्टाचार भएकाे भन्दै अहिले पनि एमालेले ‘वाइड बडी काण्ड’काे छानबिन हुनुपर्ने माग गर्दैआइरहेकाे छ ।