एमाले कोशी अधिवेशनको तयारी पूरा, मधेश अधिवेशनको लोगो सार्वजनिक

११ असोज, काठमाडौं । नेकपा (एमाले)को कोशी प्रदेश कमिटीले प्रदेशको प्रथम अधिवेशनको तयारी पुरा भएको जनाएको छ । दुई दिनसम्म चल्ने अधिवेशन शुक्रबार सुरु हुँदैछ । अधिवेशनको तयारी पुरा भएको प्रदेश कमिटी अध्यक्ष तुलसीप्रसाद न्यौपानेले बताए । 

अधिवेशनको उद्‍घाटन पार्टी अध्यक्ष  केपी शर्मा ओलीले गर्नेछन् । अधिवेशनमा १३७ पालिका, २३ जनवर्गीय संगठन र मनोनितसहित १०४७ प्रतिनिधि सहभागी हुने न्यौपानेले बताए । अधिवेशनबाट ५ पदाधिकारीसहित २१५ सदस्यीय  प्रदेश  कमिटी बन्नेछ ।

यस्तै, एमालेको मधेश प्रदेशको यही असोज २४ र २५ गते प्रथम अधिवेशनको नारा र लोगो सार्वजनिक गरिएको छ । आज जनकपुरधाममा एक पत्रकार सम्मेलन आयोजना गरेर केन्द्रीय सचिव योगेश भट्टराई, पोलिटब्युरो सदस्यद्वय लिलानाथ श्रेष्ठ र जुली महतोले संयुक्त रुपमा लोगो सार्वजनिक गरेका छन् । 

नारा  ‘सामाजिक न्याय र सुशासन हाम्रो कार्यभार, मधेशको स्वाभिमान र समृद्धिको लागि एमाले सरकार’ तय भएको छ । बागमती र कर्णालीमा अधिवेशन चलिरहेको छ । लुम्बिनीमा अधिवेशन भइसकेको छ ।