एमाले बागमती कमिटी चयनका लागि मतदान जारी, अध्यक्षमा ढुंगेल र दाहालबीच भीडन्त

२१ असोज, काठमाडाैं ।  नेकपा (एमाले) बागमती प्रदेशको नयाँ कमिटीले चयनका लागि ललितपुरको च्यासलमा मतदान जारी छ । अधिवेश सुरु भएको पाँचौं दिनमा आज बल्ल मतदान सुरु भएको हो ।

सहमतिको प्रयास गर्दैमा चार बिताएको एमाले बागमती कमिटी निर्वाचन मण्डलले अध्यक्ष पदका लागि कैलाश ढुंगेल र कृष्णप्रसाद दाहालको अन्तिम उम्मेदवारको रुपमा नामावली प्रकाशन गरेको छ । मतदान विद्युतीय मेशिनबाट भइरहेकाे छ ।

यसअघि अध्यक्षमा पाँच जनाको उम्मेदवारी परेकामा केन्द्रीय नेताहरुको दबाबमा ३ जनाले उम्मेदवारी फिर्ता लिएका छन् ।  आज बिहान ८ बजे मतदान सुरु गर्ने भनिएपनि १ बजे मात्र मतदान सुरु भएको हो । अहिलेसम्म ४० प्रतिशत मतदान भएको बताइएको छ । निर्वाचनमा १ हजार १ सय ७४ मतदाता छन् । आजै अन्तिम परिणाम आउने दाबी गरिएको छ । 

एक उपाध्यक्ष पदका लचागि ईश्वरचन्द्र पोखरेल, दावा दोर्जे लामा, नारायणप्रसाद खतिवडा र राजेन्द्र राजथला गरी ४ जना मैदानमा छन् । सचिवमा नवराज सिलवाल र हस्तबहादुर पण्डित उम्मेदवार छन् । दुई उपसचिवका लागि १० जना प्रतिस्पर्धामा छन् । महिला उपसचिवमा भक्तिमाया लामा रिता गौतम ढकाल प्रतिस्पर्धामा छन् । खुला १७ सदस्यमा ३४ जनाबीच प्रतिस्पर्धा चलिरहेको छ ।

अध्यक्षमा ढुंगेललाई पार्टी अध्यक्ष केपी शर्मा ओली र दाहाललाई उपाध्यक्षा विष्णु पाैडेलले साथ दिइरहेका छन् ।