तीन वटा जहाज खरिद प्रकृयाको प्रस्ताव प्रधानमन्त्रीको टेबुलमा

१८ असाेज, काठमाडौं । पर्यटन मन्त्रालयले तीन वटा जहाज खरिदका लागि मन्त्रिपरिषदमा प्रस्ताव पठाएको छ । प्रधानमन्त्री पुष्पकमल दाहाल प्रचण्डले तीन वटा जहाज खरिद गर्नका लागि प्रस्ताव मागेपछि मन्त्रालयले नेपाल वायु सेवा निगम मार्फत पठाएको मन्त्रालय उच्च स्रोतले जानकारी दियो । सो प्रस्ताव यति बेला प्रधानमन्त्रीको टेबुलमा पुगेको स्रोतले जनाएको छ । 

प्रधानमन्त्री दाहालले निगमका लागि तीन वटा जहाज खरिद प्रकृया अघि बढाउन पर्यटन मन्त्रालयसँग प्रस्ताव मागेका थिए । सो प्रस्ताव गत बिहिबार मात्रै मन्त्रिपरिषदमा पठाएको स्रोतले जनाएको छ  । नेपाल वायुसेवा निगमका कार्यकारी अध्यक्ष युवराज अधिकारीले प्रधानमन्त्री दाहाल अमेरिका तथा चीन भ्रमणमा जानुअघि प्रधानमन्त्री कार्यालय सिंहदरबारमा पुगेर तीन वटा विमान खरिद गर्नुपर्ने प्रस्ताव गरेका थिए ।

सोही प्रस्तावको आधारमा पर्यटन मन्त्री सुदन किराँतीलाई   प्रधानमन्त्रीले जहाज खरिदको प्रस्ताव ल्याउन निर्देशन दिएका थिए । सोही निर्देशन अनुसार मन्त्रालयले जहाज खरिदको प्रस्ताव प्रधानमन्त्री तथा मन्त्रिपरिषदमा पठाएको हो । एयरबस ३२० र वाइडबडी ए ३३० जहाज खरिदमा लिएको ऋणको समेत समयमा किस्ता र ब्याज भुक्तानी गर्न नसकेको अवस्थामा सरकारले थप तीन वटा जहाज खरिद गरेर अन्तर्राष्ट्रिय उडान गर्ने भएको हो ।

मन्त्री किरातीले गत भदौमा नेपाल वायुसेवा निगम ट्वीनअटर जहाज खरिद प्रक्रिया अन्तिम चरणमा पुगेको बताएका थिए । प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समितिको आज सिंहदरबारमा कसेको बैठकमा मन्त्री किरातीले निगम आफैले आन्तरिक उडानका लागि तीन थान जहाज खरिद गर्न लागेको जानकारी दिएका थिए । तर प्रधानमन्त्रीले एयरबस नै खरिदका लागि प्रस्ताव मागेका छन् ।

उनले ट्वीनअटर भन्दा एयरबस नै खरिद गर्न रुची देखाएको स्रोतको दावी छ । दुर्गम क्षेत्रका विमानस्थलमा उडान भर्नका लागि तीन थान ट्वीनअटर जहाज खरिद गर्ने अन्तिम तयारीमा रहेको र निगमले आन्तरिकतर्फ २२ गन्तव्यमा सेवा दिने गरी जहाज खरिदको प्रक्रिया अघि बढाइएको थियो । निगमसँग हाल आन्तरिक उडानमा दुई थान ट्वीनअटर जहाज छन् ।  

मन्त्रालयले दुई साता अघि जहाज खरिद गर्ने विषयमा अपौचारिक रुपमा छलफल गरेको स्रोतको दावी छ । प्रधानमन्त्री कार्यालयले जहाज खरिद गर्ने विषयमा राय समेत मागेको थियो । मन्त्रालयले नेपालको प्रचलित कानुन अनुसार नेपाल वायुसेवा निगमबाट प्रकृया अघि बढाउन मिल्ने राय दिएको थियो । प्रधानमन्त्री अमेरिका जानुअघि नै निगमका कार्यकारी अध्यक्ष अधिकरीले प्रधानमन्त्री दाहाल र पर्यटनमन्त्री सुदन किराँतीलाई समेत राखेर प्रधानमन्त्री कार्यालयमा निगमको वर्तमान अवस्था र दायित्वबारे ब्रिफिङ गर्दै तीन वटा जहाज खरिद गर्नुपर्ने आवश्यकता उल्लेख गरेका थिए । प्रधानमन्त्रीले त्यसैदिन जहाज खरिद गर्न सरकार तयार रहेको बताउँदै खरिद प्रस्ताव पठाउन मन्त्रीलाई निर्देशन दिएको स्रोतले जनाएको छ ।