झापामा नापी कार्यालयका कर्मचारी घुस रकमसहित पक्राउ

३० असोज, इटहरी । अख्तियार दुरुपयोग अनुसन्धान आयोग इटहरी कार्यालयबाट खटिएको टोलीले झापाा नापी कार्यालयका एक कर्मचारीसहित २ जनालाई घुस रकमसहित पक्राउ गरेको छ । सेवाग्राहीसँग घुस लिएको आरोपमा उनीहरुलाई सोमबार दिउँसो पक्राउ गरिएको हो । 

पक्राउ पर्नेमा कार्यालयका सर्वेक्षक देवनारायण ठाकुर र बिचौलिया उमेश यादवलाई एक लाख २५ हजार रुपैयाँ घुस रकमसहित भद्रपुरबाट पक्राउ गरेको आयोगको इटहरी कार्यालयले जनाएको छ । 

उनीहरुलाई भद्रपुर नगरपालिका–७ बाट बिचौलिया यादवको पूजा तथा फलफूल पसलमा सेवाग्राहीसँग नगद ७० हजार र ५५ हजार रुपैयाँको चेक लिँदै गर्दा रंगेहात पक्राउ गरिएको जनाइएको छ । 

आरोपीहरुलाई इटहरी कार्यालयमा राखिएमा आजै आयोगको केन्द्रीय कार्यालयमा पठाइएको छ । कर्मचारी नै घुस असुलीमा लागेको घटना बढेपछि आयोगले निगरानी बढाएको छ ।