नेप्सेः ९७ कम्पनीको घट्यो, १४ वटाको शेयर मूल्य स्थिर

१३ कात्तिक, काठमाडौं । शेयर कारोबार मापक नेप्से परिसूचक सोमबार झिनो अंकले बढेको छ । सो दिन बजार खुलेदेखि लगातार दोहोरो अंकले घटेको बजार अन्तिम समयमा ३.०४ अंकले बढेको हो । यससँगै समग्र नेप्से १ हजार ८ सय ७९.७० विन्दुमा बन्द भएको छ ।

अघिल्लो दिनको तुलनामा यो ०.१६ प्रतिशतले बढी हो । दसैं बिदापछिको पहिलो कारोबार दिन शेयर कारोबार दिन आइतबार नेप्से २८ अंकले घटेको थियो । करिब तीन साता अघि राष्ट्र बैंकले परिमार्जन गरेको नीतिगत व्यवस्था लगानीकर्ताले नरुचाएपछि नेप्से लगातार घटिरहेको थियो । 

यसलाई राष्ट्र बैंकको पछिल्लो नीतिगत संशोधनलाई लगानीकर्ताले सकारात्मक रूपमा नलिएको रूपमा विश्लेषण गरिएको छ । तर, सोमबार बजारले सुधारको संकेत देखाएको हो । सो दिन ३० हजार २ सय ३७ वटा कारोबारबाट २८ लाख २४ हजार कित्ता शेयर किनबेच भएको छ । ती किनबेचमा ६९ करोड ४२ लाख २२ रुपैयाँ बराबरको सेयर कारोबार भएको छ । 

अघिल्लो दिनको तुलनामा कारोबार रकम कम हो । आइतबार सेयर बजारमा ७४ करोड २९ लाख रुपैयाँ बराबरको शेयर कारोबार भएको थियो । सोमबार कारोबारमा आएकामध्ये १२८ वटा कम्पनीको सेयर मूल्य बढ्यो । ९७ वटा कम्पनीको घट्यो भने १४ वटाको शेयर मूल्य स्थिर छ ।