राष्ट्रसंघका महासचिवले सम्बोधन गर्ने संसद बैठकमा निम्तो दिएका सबैलाई औपचारिक पोशाक अनिवार्य

१४ कात्तिक, काठमाडौं । नेपालको औपचारिक भ्रमण आएका संयुक्त राष्ट्रसंघका महासचिव एन्टोनियो गुटेरेसले आज संघीय संसदको संयुक्त बैठकमा सम्बोधन गर्ने कार्यक्रम रहेको छ । उनको सम्बोधनका लागि सबै तयारी सकिएको संसद सचिवालयले जनाएको छ । 

गुटेरेसले सम्बोधन गर्ने भएकोले आजको संसदमा संवैधानिक निकायका पदाधिकारीलगायत अन्य उच्च पदस्थ व्यक्तिहरूलाई पनि संसदमा उपस्थितिका लागि निमन्त्रणा दिइएको छ । महासचिव गुटेरेसले आज दिउँसो ४ बजे राष्ट्रिय सभा र प्रतिनिधिसभाको संयुक्त बैठकलाई सम्बोधन गर्ने संघीय संसद सचिवालयले जनाएको छ । 

उनले संसदलाई पूर्व तयारी अनुसार नै सम्बोधन गर्ने भएका हुन् । महासचिव गुटेरेसले सम्बोधन गर्ने भएपछि सभामुख देवराज घिमिरेले सोमबार बेलुका नै सभा कक्षको कक्षको निरीक्षण गरेका थिए ।

सभामुख घिमिरेले यसअघि नै सांसदहरूलाई बैठक सुरु हुनुअघि पौने ४ बजेभित्र अनिर्वाय रूपमा औपचारिक पोशाकमा संसदमा उपस्थित भइसक्न निर्देशन दिएका थिए । उनले महिला र पुरुष सांसदहरूलाई औपचारिक पोशाक लगाएर मात्र बैठकमा आउन निर्देशन दिइसकेका छन् ।

आइतबार बिहान नेपाल आइपुगेका महासचिव गुटेरेस मंगलबार बिहान अन्नपूर्ण आधार शिविर पुगेर लुम्बिनीको अवलोकन सकेर संसदलाई सम्बोधन गर्न आइपुग्ने कार्यक्रम छ ।