विद्रोह या विकल्पः अबको बाटो
भुवनेश्वर अर्याल
कात्तिक १७, २०८० शुक्रबार १५:४९:२८
वर्तमान संसदले एक वर्ष पूरा गरेको छ । कसैको पनि बहुमत नपुगेको संसदमा दोस्रो ठूलो दल प्रतिपक्षमा छ । सबैभन्दा ठूलो दलको समर्थन र सहभागितामा ३२ सीटे तेस्रो दलले सरकार चलाई रहेको छ । संसारमा कहीँ पनि नभएको राजनीतिको अभ्यास भनौँ या भागबन्डा नेपालमा मात्र देख्न सकिन्छ । निकै भिन्न पृष्ठभूमि र फरक फरक चुनावी घोषणा पत्र एवं चुनाव चिन्ह लिएर चुनाव लडेका दलहरुलाई सत्ताको स्वार्थले मात्र जोडेको इतिहास नेपालबाहेक संसारमै कतै नहोला ।
नेपालको संसद होस् या संविधानसभा, कुनै खास इस्युमा छलफल गरेर निष्कर्ष कहिल्यै निस्केको छैन । भएको छ त खाली केही नेताहरूको कोठे बैठकका निर्णयहरू र भागबन्डा ! भागबण्डाले अन्तरिम संसद बनायो, त्यसैले गणतन्त्र घोषणा गर्यो, दुई दुई पटक संविधानसभाको चुनाव भएपनि कोठे बैठकले विदेशीहरुको स्वार्थ पूरा गर्ने र देशलाई राजनीतिक अस्थिरता तर्फ धकेल्ने संविधान बनायो । जनताले दिएका बोराका बोरा सुझावहरूलाई अँध्यारो कुनामा मिल्काएर चार जना नेताले बनाएको तथाकथित संविधानलाई झोलेहरुबाट ताली पिटाएर संसारकै अब्बल संविधान भनेर लागू गरियो । त्यसकै दुष्परिणामहरु आज देशले भोग्दैछ । प्रदेशका सांसद र सरकारहरू निकम्मा मात्र देखिएनन् तिनले कार्यकर्ता व्यवस्थापन गरेर राष्ट्र दोहन मात्र गरे । कहिल्यै कसैको बहुमत आउन नसक्ने प्रदेश र संघीय संसदको भीमकाय संरचनाले देश झन पछि झन कंगाल हुने कुरा निश्चित जस्तै भइसक्यो ।
काम लागेनन् ठूला पार्टी
ठूला राजनीतिक पार्टीका प्रायः सबै ठूला नेता भ्रष्टाचारमा डुबेको र कुनै न कुनै काण्डमा मुछिएको देखि हालियो । मानव बेचबिखन, सरकारी सम्मति हिनामिनादेखि पशुपतिको जलहरि काण्डमा भ्रष्टाचार भएको ठहर भयो । प्रधानमन्त्री , सिङ्गो मन्त्रिपरिषद र राष्ट्रपतिसम्मले संविधानको दुरुपयोग गरि विभिन्न अपराधहरू प्रमाणित भएर जेल परेकाहरूलाई आम माफी दिने दुष्कर्म गरेको कुरा अदालतले प्रमाणित गरिसक्यो । यस्तो अवस्थामा पनि नेपाली जनता चुप लागेर बसे भने यो देशमा बस्न होला ? अझ पनि यिनै पार्टीका झण्डा बोकेर, यिनको झोले कार्यकर्ता भएर हिड्नेहरुले आत्म समीक्षा गर्नु पर्दैन ? केन्द्रदेखि वडासम्म एमाले, कांग्रेस र माओवादी पार्टीमा रहेका आम कार्यकर्ता, बुद्धिजीवी, किसान मजदुर र उद्यमी सबैले यिनको झोला फ्याँकेर यिनीहरुले गरेको अपराध कर्मबाट आफूलाई मुक्त गर्न ढिला गर्नु हुँदैन ।
नेता खराब हुनुमा नेता मात्र दोषी होइनन् । पटक पटकको धोखा घडी गर्ने, आम जनतालाई देखाएर खर्बौंका विदेशी ऋण ल्याएर गलत ठाउँमा लगानी गर्ने र भ्रष्टाचार गर्नेहरू राष्ट्र र जनताका दुस्मन हुन् । अब पनि हामीले उनीहरूलाई साथ दिनु भनेको राष्ट्र द्रोहमा हामी पनि अप्रत्यक्ष संलग्न हुनु हो । त्यसैले अब हामी पापको भारी नबोकौं । हाम्रा सन्ततिको लागि हामीले सोचौं । ती पार्टीहरूमा अझै पनि हजारौं उर्जावान र इमानदार कार्यकर्ताहरू हुनुहुन्छ । वहाँहरुलाई भ्रम छ, नेतृत्वले केही गर्छ कि भन्ने ! त्यो भ्रमबाट अब मुक्त हुनुपर्छ । जनताले पटक पटक कांग्रेसलाई, माओवादी र एमाले मिलेर बनेको नेकपालाई राष्ट्र निर्माणको कार्यभार सुम्पिएका हुन् । तर उनीहरूमा अलिकता पनि देशको माया देखिएन । जनताबाट प्राप्त अधिकार र शक्तिको सदुपयोग कहिल्यै भएन, भयो त दुरुपयोग मात्र ।
चार दशक हेरेका पुरानोलाई होइन नयाँ हेरौं
केही मित्रहरू भन्छन्, एउटा पार्टीमा टिकिरहनु पर्छ । राजनीतिलाई पेशा बनाउनेहरूले यो कुरा ठीकै भनेका होलान् तर हामी त देश बन्छ कि भनेर पार्टीहरूलाई सहयोग गर्छौं । कांग्रेस, एमाले, माओवादी सबैलाई त मौका दिएकै हो । उनीहरूले देशलाई धोखा दिएपछि फेरि पनि हामीले सहयोग गरिरहने ? अरूको कुरा थाहा छैन तर म भन्छु हामीसँग व्यक्तिगत स्वार्थको चाहना छैन भने कुनै अमुक पार्टीको दास किन बनिरहनु पर्ने ?
शहरिया र सचेत मतदाताहरूले विकल्पको स्वरूप गत स्थानीय तह निर्वाचनमै खोजे । काठमाडौं, धनगढी र धरानले आफ्नै शैलीमा विद्यमान स्थापित दलहरुलाई चुनौती दिएकै छन् । त्यहाँका जनाको रोजाईले केही सुखद परिणाम हासिल पनि भएका छन् । अन्यत्र हेरौं त अधिकांश गाउँ नगर पालिकाहरुमा भ्रष्टाचारको बिगबिगी छ । कति त कसुर प्रमाणित भएर प्रमुख, उपप्रमुख र वडाध्यक्षहरु जेल परिसके । स्थानीय तहमा पार्टीगत चुनाव हुँदा पार्टीको टिकट लिएर चुनाव जित्नेहरूले अधिकांश ठाउँमा जनतालाई न्याय गरेनन् । कम्तीमा धरान र काठमाडौंका मेयरहरुलाई भ्रष्टाचारको आरोप लागेको त छैन नि !
सिङ्गो संघीय संसदमा केही दर्जन नयाँ सांसदहरुले देश र जनताको पक्षमा निरन्तर बोलिरहेका छन् । खास गरेर रास्वपा र राप्रपाका सांसदहरुले पुराना पार्टीहरूले गरेका गलत राजनीतिक अभ्यासहरूको डटेर सामना गरिरहेका छन् । संसदीय अंकगणितमा सबै कुरा बहुमतले निर्णय हुने भएपनि न्यायका आवाजहरू बुलन्द भएका छन् । हरेक विषयमा अध्ययन गरेर तयारीका साथ बोलिरहेका छन् । यो कुराले सकारात्मक सन्देश त दिएको छ नि !
केही आशंका, केही अस्पष्टताका बीच पनि विकल्पमा आएका दलहरुलाई अगाडि ल्याउनै पर्छ । समय र अनुभवले उनीहरू खारिने छन् र देशलाई नयाँ दिशा दिनेछन् भन्नेमा आशावादी हुनै पर्छ । पुरानाहरुमा त हामीले बितेको चार दशक हेरिसक्यौं । अब यिनमा न सिङ उम्रिन्छ न त जुरो पलाउँछ ।
कस्तो हुनुपर्छ वैकल्पिक पार्टी ?
रास्वपा वैकल्पिक राजनीतिको उदीयमान शक्ति हो । यो पार्टीको सम्भावनालाई हेरेर केही गलत तत्वहरु यसभित्र स्वार्थको लागि पसेका अवश्य छन् । त्यो बाहेक ठूलो आँट र परिश्रमले यो पार्टी बनेको छ । रास्वपामा युवाहरूको आकर्षण बढिरहँदा पुराना पार्टीका मान्छेहरूले विचारविहीन पार्टीको रुपमा व्यापक प्रहार गरिरहेका छन् । जसले यो पार्टी निर्माण र यसमा थपिँदै गएको शक्तिबाट उनीहरू आत्तिएको सहजै अनुमान लगाउन सकिन्छ । हिजो राजालाई गाली गरेर बनेका पार्टीहरू अचेल रवि, बालेन, हर्क र दुर्गा प्रसाईं विरुद्ध बिषवमन गरिरहेका छन् ।
बालेन, हर्क ,डा. सीके राउत , राजेन्द्र लिङदेन, रविन्द्र मिश्र तथा देशव्यापी रुपमा वैकल्पिक पार्टी निर्माणको अभियानमा लाग्नु भएका डम्मर खतिवडा, प्रशान्त सिंहहरू एक ठाउँमा आएर राष्ट्रलाई विकल्प दिउन भन्ने सबैको चाहना छ । बितेको सत्तरी बर्ष विचारको राजनीति गरेकाहरूको सत्तामा पुगेपछि विचारको कार्यान्वयन त हेरि हालियो ! देउवा, प्रचण्ड, ओली, माधव नेपाल या बाबुराम उनीहरू सत्तामा जाँदा तिनका विचारले के ओखेल्यो र ? व्यवहारमा लागू गर्न नसक्ने विचारको शब्दजाल बेकारको कुरा हो । विचारकै कुरा गर्दा कथित जनयुद्ध लडेको कम्युनिष्ट पार्टी र पुँजीवादी प्रजातन्त्र मान्ने कांग्रेस कुन विचारले सँगै हिँड्न सक्छन् ? त्यसैले कम्तीमा विकल्पमा आउने नयाँ राजनीतिक पार्टीहरूले अरूलाई गाली र अपमान गरेर राजनीतिको रोटी नसेकुन् ।
पटक पटक व्यवस्था फेर्ने भन्दा पनि जन अभिमतको प्रयोगबाट संविधानलाई सुधार र परिमार्जन गरेर देशलाई अघि बढाउने कुरामा अघि सरुन भन्ने जनताको चाहना बुझून् । ठीकै छ नि, आम जनताको भोट लिएर राष्ट्रपतिको ठाउँमा संवैधानिक राजा ल्याउने गरि अनुमोदित भएछ भने मानिदिउँला राजेन्द्र लिङ्देनको राप्रपालाई पनि किन हेला होचो गर्नु पर्यो र ? आफ्नो बगैंचामा फरक फरक फूल रोप्ने अधिकार त सबैलाई छ । कुन फूल छान्ने भन्ने त जनताको रोजाई हो । निरपेक्ष रुपमा कसैको विरोध गर्नुपर्ने छैन । पुरानै पार्टीहरूमा पनि सुधार भएर आए हुन्थ्यो तर त्यो सम्भावना प्रायः शून्य नै छ । बरु आउने चुनावसम्म विकल्पलाई निस्तेज पार्न विभिन्न बहानामा पुराना शक्तिहरू एकजुट हुने सम्भावना बढेर गएको देखिँदै छ ।
वैकल्पिक राजनीतिका प्रति जनतामा रहेको आशंका बीच जन अपेक्षा
पटक पटक राजनीतिले धोखा दियो । कसलाई कति विश्वास गर्ने नेपाली राजनीतिमा य जटिल प्रश्न हो । सत्ता बाहिर छँदा र सत्तामा हुँदा पार्टीहरुले देखाउने चरित्र वैकल्पिक शक्तिहरूले नदेखाउन् । रवि, राजेन्द्र लिङ्देन, बालेन या हर्कहरूले सत्ता स्वार्थको निमित्त राजनीतिक नैतिकता शून्य भएका एमाले कांग्रेस, माओवादी र पुराना मधेशी नेताहरूसँग सत्तामा साझेदार नबनुन् । देशमा विद्यमान भ्रष्टाचार, महंगी, असुरक्षा, पक्षपात, बेरोजगारी र अपराधीहरूलाई आममाफी दिने जस्ता गलत कुराहरूको शान्तिपूर्ण विरोधमा जनपरिचालन गरून् भन्ने जनचाहना छ । आजको दिनसम्म नयाँ विकल्पको रुपमा उदाएको पार्टी रास्पवा नै हो । खास गरेर रवि र उनको पार्टीले सत्ता प्राप्तिको निमित्त पुराना दलसँग कहिल्यै सम्झौता गर्दैनन् भन्ने सुनिश्चितता हुनै पर्छ । देशमा राजनीतिको नयाँ विकल्पको खोजीमा इमानदारीपूर्वक लाग्नु हुने सबैप्रति उच्च सम्मान अर्पण गर्दछु ।
देशमा वैकल्पिक राजनीतिको बेडा उठाउनेहरूले धान्नै नसकिने भद्दा संसद, यो स्वरूपको प्रदेश संरचना, खर्चिलो चुनाव तथा अधिकारविहीन स्थानीय तहको अवस्थालाई व्यापक सुधार गर्ने प्रतिबद्धता पूरा गर्नै पर्छ । सेना, पुलिस प्रशासन, न्यायालय तथा संवैधानिक निकायका साथै देशको कुटनीतिक क्षेत्रमा भागबण्डाको अन्त गरि उच्च नैतिकता भएका दक्ष व्यक्तिहरूको छनौटले मात्र सुशासन स्थापना गर्न सकिन्छ भन्ने मान्यतालाई आत्म साथ गर्नै पर्छ ।
अन्तमा भ्रष्टाचार, सरकारी जग्गाको अपचलन, मानव बेचबिखन र अपराधीहरूको आममाफी जस्ता कुरा पुराना पार्टीहरूका साझा उद्देश्य देखिए । सबैको मिलेमतोमा यी कामहरू भएका हुनाले पुरानो पार्टीमा आबद्ध हजारौं इमानदार कार्यकर्ताहरूले कि विद्रोह गरौं नसके पार्टी छोडेर स्वतन्त्र बसौं ।
भुवनेश्वर अर्याल
लेखक अर्याल नेपाली राजनीतिलाई नजिकबाट नियाली रहेका एक व्यवसायी, समाजसेवी र राजनीतिकर्मी हुन् ।
लेखकबाट थपगठबन्धनका नेताहरु सरकार जागोउन जे पनि गर्न तयार हुने, जनता रोइरहने ?
बैशाख २९, २०८१ शनिबार
प्रचण्डको यूटर्नले जोगिएको रवि लामिछानेको पद
बैशाख २७, २०८१ बिहिबार
कम्युनिष्टहरूले अरूको अस्तित्व समाप्त पारेर कस्तो लोकतन्त्र स्थापना गर्न चाहेका होलान् ?
बैशाख २५, २०८१ मंगलबार
बजेट बनाउन अर्थमन्त्रीको टीम भन्दा गिरोह सक्रिय, करका दरमा खेल्ने प्रयास
नेपालबहस संवाददाता
बैशाख २९, २०८१ शनिबार
उडिरहेको विमानमा एयर होस्टेसलाई यात्रुले दुर्व्यवहार गरेपछि...
नेपालबहस संवाददाता
बैशाख ३०, २०८१ आइतबार
उडिरहेको विमानमा एयर होस्टेसलाई यात्रुले दुर्व्यवहार गरेपछि...
बैशाख ३०, २०८१ आइतबार
यस वर्ष पनि एनएमबी बैंकका शेयरधनीको हात खाली, वितरण योग्य मुनाफा ऋणात्मक
बैशाख ३०, २०८१ आइतबार
सरकारलाई दिएको समर्थन फिर्ता लिने जसपा नेपालको निर्णय
बैशाख ३०, २०८१ आइतबार
धुलिखेल र जापानको सरोमा नगरबीच सीप–प्रविधि आदानप्रदान सम्झौता
बैशाख ३०, २०८१ आइतबार
ठगी आरोपमा चार जना पक्राउ
बैशाख ३०, २०८१ आइतबार
सर्वोच्चद्वारा वर्ल्डलिंकको रिट खारेज,शुल्क असुल्न बाटो खुल्ला
बैशाख ३०, २०८१ आइतबार
राजस्थानमाथि चेन्नई ५ विकेटले विजयी
बैशाख ३०, २०८१ आइतबार
सिन्धुपाल्चोकमा मोटरसाइकल दुर्घटना हुँदा एकको मृत्यु
बैशाख ३०, २०८१ आइतबार