भुकम्पमा राहत : अहिलेसम्म १५ करोड ३९ लाख घोषणा, आश्वासन जुट्दै

१९ कात्तिक, काठमाडौं । जाजरकोट क्षेत्रमा भुकम्पबाट भएको जनधनको क्षतिमा राहत सहयोग गर्न प्रतिस्पर्धा जस्तै देखिएको छ। मित्र राष्ट्रहरु, राजनीतिक दल, व्यवसायी र संस्थाहरूबाट धमाधम आर्थिक सहयोगको घोषणा भइरहेको छ। हालसम्म १५ करोड ३९ लाख एघार हजार नगद सहयोगको  घोषणा भएको छ। 

स्थानीय निकायहरू, प्रदेश सरकार र संघीय सरकारहरूले पनि अलग्गै आर्थिक सहयोगको घोषणा गरिरहेका छन्। चीन सरकारले १० करोड सहयोग दिने घोषणा गरेको छ।  भाटभटेनी सुपरमार्केटका संस्थापक मीनबहादुर गुरुङ्गले १ करोड ११ लाख ११ हजार राहत सहायताका लागि आर्थिक सहायताको घोषणा गरिसकेका छन्। 

त्यसैगरी, बुद्ध एयरले १ करोड, नेकपा एमालेले १ करोड, नेपाली कांग्रेसले ५० लाख, राष्ट्रिय स्वतन्त्र पार्टीले ५० लाख, एनसेलले ५० लाख, अर्ना वियरले २५ लाख, एनआरएन शर्मा समूहले २१ लाख, एनआरएन केसी समूहले १० लाख, एनआरएन जापान शाखाले १५ लाख र नेपाल विद्यार्थी संघले ७ लाख नगद सहयोगको घोषणा गरिसकेका छन्। भूकम्प प्रभावित क्षेत्रमा सहायता दिन अमेरिका, भारत, रुस र अन्य राष्ट्रहरूले पनि सरकारलाई सन्देश पठाइसकेका छन्।