आठबिसकोट र सानीभेरीका ५२ मृतकका परिवारले २५ हजारका दरले पाए किरिया खर्च

२१ कात्तिक, रुकुमपश्चिम । जाजरकोट भूकम्पमा परी मृत्यु भएका रुकुमपश्चिमका सबै परिवारलाई स्थानीय सरकारले किरिया खर्च र राहत सामग्री उपलब्ध गराएका छन् ।

आठबिसकोट नगरपालिका क्षेत्रमा ४२ जना मृतक र सानीभेरी गाउँपालिकामा १० जनाको मृत्यु भएको थियो । आठबिसकोटका दुई जना र सानीभेरीका दुई जनाको जाजरकोटमा मृत्यु भएको थियो भने आठविसकोटमा जिल्ला बाहिरका चार जनाको मृत्यु भएको थियो ।

आठबिसकोट र सानीभेरी क्षेत्रमा किरिया कर्म गरिरहेका सबै मृतकका परिवारलाई सम्बन्धित स्थानीय तहले २५ हजार रुपियाँको दरले किरिया खर्च दिइसकेको जानकारी दिएका छन् । आठबिसकोट नगरपालिकाका निमित्त प्रमुख प्रशासकीय अधिकृत मनिराज शाहका अनुसार किरिया खर्चसँगै राहतसमेत उपलब्ध गराइएको छ । नगरप्रमुख रवि केसी र उपप्रमुख धनकुमारी शाहीको उपस्थितिमा उक्त सहयोग हस्तान्तरण गरिएको हो ।

सानीभेरी गाउँपालिकाका बाल अधिकार अधिकृत मानवीर ओलीका अनुसार भूकम्पका कारण मृत्यु भएका १२ जना मृतकका घरमा पुगेर २५ हजार रुपियाँको दरले किरिया खर्च र राहत सामग्री बुझाइसकिएको छ । अन्य पीडितहरुलाई पनि तीव्ररुपमा राहत वितरण गरिरहेको उनले जानकारी दिए ।