रौनक गुमाएको तिहार : छोराछोरी विदेश पठाएर जीवन चलाउनेको तिहार रमाइलो होला र ?
भेषराज पोखरेल
कात्तिक २५, २०८० शनिबार १०:७:५
नेपालको दोस्रो महत्वपूर्ण र ठूलो चाड तिहार सुरु भइसकेको छ । दशैं, तिहार नेपालका ठूला सांस्कृतिक पर्व त हुन् नै आर्थिक रुपमा पनि महत्वपूर्ण चाड हुन् । दशैं, तिहारको व्यापार तथा आन्तरिक उत्पादनलाई हेरेर अर्थतन्त्र कुन लयमा छ भन्ने कुरा निर्धारण गर्ने गर्छ । पहिले, पहिले जस्तै राम्रो लगाउन र मीठो खान दशैं, तिहार नै कुर्नुपर्ने अवस्था त अहिले रहेन तर पनि सबैको महान चाड, अझ सांस्कृतिक रुपमा पनि महत्वपूर्ण पर्व भएकाले विभिन्न उपभोग्य सामग्रीको खरिद, बिक्री द्रुत गतिले बढ्ने र स्थानीय उत्पादनहरू पनि बजारमा आउने भएकाले शहर र गाउँ सबैतिरको अर्थतन्त्र चलायमान हुन जान्छ ।
यो वर्ष पनि केही रुपमा त अर्थतन्त्र चलायमान भइरहेको छ नै तर अन्त्यन्तै सुस्त गतिमा अघि बढिरहेको अर्थतन्त्र जुन गतिमा अघि बढ्नुपर्ने हो त्यो गतिमा अघि बढ्न सकेको छैन । अर्को, अहिलेको दशैं, तिहारको अवस्थालाई हेर्दा नेपालको अर्थतन्त्र आत्मनिर्भरबाट परनिर्भर हुँदै गएको देखिएको छ । सरकारले बाह्य पक्षलाई हेरेर अर्थतन्त्र लयमा रहेको बताए पनि रेमिट्यान्सबाहेक अन्य क्षेत्रमा अर्थतन्त्र सुधारको अवस्थामा देखिन्न । बढिरहेको रेमिट्यान्सले अब वर्षभरि हुने आयातका लागि सरकारले टाउको दुःखाउन नपर्ने भएको छ भने सर्वसाधारण नागरिकले पनि विदेशिएका छोराछोरीले पठाएको पैसाले सजिलै जीवन निर्वाह गर्ने अवस्था आएको देखिएको छ । आफ्नो उत्पादन नभएर छोराछोरी विदेशिएर पठाएको पैसाबाट रमाउनुपर्ने तिहारको उमंग कस्तो होला ?
असोज मसान्तसम्म विदेशी मुद्रा सञ्चिति १६ खर्ब ४३ अर्ब ९ करोड रुपैयाँ बराबर पुगेको छ । राष्ट्र बैंकको तथ्यांक अनुसार असार मसान्तसम्म यस्तो सञ्चिति १५ खर्ब ३९ अर्ब ३६ करोड रूपैयाँ बराबर थियो । विदेशी मुद्राको सञ्चितिमा रेमिट्यान्सको हिस्सा धेरै ठूलो छ । सरकारले पछिल्लो समय विदेशी लगानीकर्तालाई आह्वान गरिरहे पनि ठूलो लगानी भित्रिएको छैन । अर्को, विदेशी दातृराष्ट्र तथा संस्थाहरूले पनि ठूलो सहायता गरेका छैनन् । देशले ती राष्ट्र वा बैंकबाट ठूलो ऋण पनि लिन सकेको छैन । यस्तो अवस्थामा झिनो रुपमा पर्यटनले विदेशी मुद्रा थपे पनि रेमिट्यान्स नै प्रमुख हो । आर्थिक वर्ष २०८०।८० को तीन महिनामा रेमिट्यान्स ३ खर्ब ३४ अर्ब ६५ करोड रूपैयाँ पुगेको छ । असोज महिनामा मात्रै १ खर्ब ३६ अर्ब ९७ करोड रूपैयाँ रेमिट्यान्स नेपाल भित्रिएको छ ।
आर्थिक वर्षको प्रथम तीन महिनामा विदेश पढ्न जाने युवाको संख्या पनि अत्यधिक बढेको देखाएको छ । यो तीन महिनामा विदेशमा अध्ययनका लागि २३ अर्ब ३२ करोड रूपैयाँ बाहिरिएको छ । राष्ट्र बैंकको मासिक प्रतिवेदन अनुसार गत सालको सो अवधिको भन्दा यो ८३ प्रतिशतले धेरै हो । गत आर्थिक वर्षको साउन, भदौ, असोजमा विदेशमा अध्ययनका लागि १२ अर्ब ७६ करोड रूपैयाँ बाहिरिएको थियो । गत आर्थिक वर्षभरि वैदेशिक अध्ययनका लागि १ खर्ब ४२ अर्ब रूपैयाँ बाहिरिएको राष्ट्र बैंकको तथ्याङ्कले देखाएको छ । यो वर्ष यही गतिले बढ्ने हो भने नेपालबाट वैदेशिक अध्ययनका लागि धेरै ठूलो रकम बाहिरिने निश्चित छ । नेपाली विद्यार्थीहरू विदेशमा पढ्ने, पढिसकेपछि नेपालमा फर्कने उद्देश्यले जाँदैनन् ।
उनीहरू कुनै न कुनै विषय पढ्ने, पढिसकेपछि त्यहीँ बसेर राम्रो कमाइ गर्ने उद्देश्यले जाने गरेको देखिन्छ । अर्को, सबै जसो विद्यार्थी पढ्न गएका राष्ट्रमा लामो समय काम गर्ने र त्यहाँको नागरिकता वा स्थायी बसोवासको प्रमाणपत्र लिएर उतै बस्ने योजना बनाएरै नेपाल छाडेको देखिन्छ । सरकारले न यो अवस्थालाई रोक्न कुनै भरपर्दो योजना बनाउन सकेको छ न सामान्य कामदारका रुपमा विदेश जाने युवालाई नेपालमै काम दिएर रोक्ने योजना बनाउन सकेको छ । आफ्ना सन्तान विदेशिने र उनीहरूले पठाएको पैसाबाट जीवन निर्वाह गर्नुपर्ने बाल र वृद्धवृद्धाको दशैं, तिहार कस्तो होला ? विदेशी बत्ती तथा झालरले घर झलमल पार्ने तर मन सधैं अँध्यारो पारेर बस्ने अवस्था त हो ।
सरकारले अर्थतन्त्र लयमा आउँदै गरेको, जनताको आवश्यकताका सेवा सुविधामा ध्यान दिएको बताइरहन्छ तर आन्तरिक उत्पादनका कुनै पनि क्षेत्रमा सुधार आएको देखिन्न । दशैंमा कृषकले डेरी उद्योगलाई दूध दिए तर ती उद्योगहरूले धूलो दूध तथा अन्य दुग्धजन्य पदार्थ नबिकेको भनेर करोडौं रुपैयाँ बक्यौता राखेका छन् । सरकारले दशैं, तिहारका लागि भारतबाट चिनी ल्याएर आम सर्वसाधारणलाई सुलभ मूल्यमा दिने हल्ला फैलायो तर दशैंमा चिनी ल्याउन सकेन । सर्वसाधारण जनताले महँगो मूल्य तिरेर चिनी किन्नुपर्यो । राष्ट्र बैंकको तथ्यांक अनुसार चिनीको मूल्य १८ दशमलव २२ प्रतिशतले बढेको छ । राष्ट्र बैंकले यस्ता तथ्याङ्क पेस गरे पनि उपभोक्ताले यो भन्दा कैयौं गुणा बढी मूल्य तिरेर चिनी उपयोग गर्नु परेको छ । सरकारले तिहारका लागि २५ हजार मेट्रिक टन चिनी भारतबाट आयात गरिने बताएको थियो ।
जीटुजी माध्यमबाट ल्याउने भनिए पनि ल्याउन सकेको देखिन्न । तिहारमा ठूलो मात्रामा उपयोग गरिने मसलाजन्य पदार्थको मूल्य ३७ दशमलव ६३ प्रतिशतले बढेको छ । सरकारले मूल्यवृद्धि ६ दशमलव ५ प्रतिशतमा कायम राख्ने भने पनि असोज महिनाको मूल्यवृद्धि ७ दशमलव ५० प्रतिशत रहेको राष्ट्र बैंकको तथ्याङ्कले देखाएको छ । औसत् मूल्यवृद्धिको तथ्यांक योस्तो देखिए पनि दैनिक अत्यावश्यक उपभोग्य वस्तुको मूल्य यो भन्दा कयौं गुणा बढी भएकाले सर्वसाधारण उपभोक्ता अन्त्यन्तै मारमा परेका छन् । अझ गरिब जनताले जीवन यापन गर्न ज्यादै कठिन पर्दै गएको छ । यस्तो अवस्थाको तिहार उनीहरूका लागि कसरी उत्साहप्रद हुने ?
सरकारले व्यापारमा नियन्त्रण गुमाउने, आन्तरिक उत्पादन बढाउन नसक्ने र भएका उत्पादनलाई पनि व्यवस्थापन गरेर बजारसम्म ल्याउन नसक्ने हो भने मूल्य नियन्त्रण गर्न सकिँदैन । अहिले भएकै त्यही हो । ओखरदेखि अन्य मसलाजन्य पदार्थ कर्णाली तथा सुदूरपश्चिम प्रदेशमा प्रशस्त उत्पादन गर्न सकिन्छ । अन्य प्रदेशहरूमा पनि कतिपय मसला उत्पादन गर्न सकिन्छ । अर्को, मुस्ताङ, जुम्ला, हुम्लादेखि हिमाली जिल्लामा स्याउको उत्पादन हुन्छ, सुन्तला पहाडी क्षेत्रमा उत्पादन हुने नै भयो । सरकारले आफूले बनाएका योजना सशक्त रुपमा लागू सके आन्तरिक उत्पादन बढाउन सकिन्छ ।
योजना बनाउने तर कार्यान्वयन नगर्ने अवस्थामा केही पनि हुन सक्दैन । यस्तो अवस्थामा सरकारले मूल्य नियन्त्रण गर्न सक्ने कुरा भएन । युवा पलायनका त अनेकौं कारण छन् । पलायन रोक्न अहिलेको अर्थतन्त्रको मोडल नै फेर्न सक्नुपर्छ । दलाल र कमिसनतन्त्र रहेसम्म अहिलेको अवस्थामा कुनै परिवर्तन हुन सक्दैन । दलाली करण र कमिसनतन्त्रको उपलब्धि नै युवा पलायन हो, बजार अनियन्त्रित हुनु हो, परनिर्भरता बढ्नु हो ।
भेषराज पोखरेल
नेपालबहस डटकमका नियमित स्तम्भकार भेष राज पोखरेल वरिष्ठ पत्रकार हुन् । विगत २५ वर्षदेखि अर्थ राजनीतिक धारमा कलम चलाउँदै आएका पोखरेलले कान्तिपुर दैनिकमा २० वर्ष भन्दा बढी समय भाषा सम्पादकका रुपमा काम गरेका छन् । स्वतन्त्र लेखकका रुपमा समेत विभिन्न दैनिक पत्रपत्रिकाहरुमा लेखहरू लेख्दै आएका पोखरेलले दुई वर्ष नेपाल तारा डटकमको सम्पादकको रुपमा काम गरेको अनुभव पनि छ ।
लेखकबाट थपगठबन्धनका नेताहरु सरकार जागोउन जे पनि गर्न तयार हुने, जनता रोइरहने ?
बैशाख २९, २०८१ शनिबार
प्रचण्डको यूटर्नले जोगिएको रवि लामिछानेको पद
बैशाख २७, २०८१ बिहिबार
कम्युनिष्टहरूले अरूको अस्तित्व समाप्त पारेर कस्तो लोकतन्त्र स्थापना गर्न चाहेका होलान् ?
बैशाख २५, २०८१ मंगलबार
बजेट बनाउन अर्थमन्त्रीको टीम भन्दा गिरोह सक्रिय, करका दरमा खेल्ने प्रयास
नेपालबहस संवाददाता
बैशाख २९, २०८१ शनिबार
उडिरहेको विमानमा एयर होस्टेसलाई यात्रुले दुर्व्यवहार गरेपछि...
नेपालबहस संवाददाता
बैशाख ३०, २०८१ आइतबार
उडिरहेको विमानमा एयर होस्टेसलाई यात्रुले दुर्व्यवहार गरेपछि...
बैशाख ३०, २०८१ आइतबार
यस वर्ष पनि एनएमबी बैंकका शेयरधनीको हात खाली, वितरण योग्य मुनाफा ऋणात्मक
बैशाख ३०, २०८१ आइतबार
सरकारलाई दिएको समर्थन फिर्ता लिने जसपा नेपालको निर्णय
बैशाख ३०, २०८१ आइतबार
धुलिखेल र जापानको सरोमा नगरबीच सीप–प्रविधि आदानप्रदान सम्झौता
बैशाख ३०, २०८१ आइतबार
ठगी आरोपमा चार जना पक्राउ
बैशाख ३०, २०८१ आइतबार
सर्वोच्चद्वारा वर्ल्डलिंकको रिट खारेज,शुल्क असुल्न बाटो खुल्ला
बैशाख ३०, २०८१ आइतबार
राजस्थानमाथि चेन्नई ५ विकेटले विजयी
बैशाख ३०, २०८१ आइतबार
सिन्धुपाल्चोकमा मोटरसाइकल दुर्घटना हुँदा एकको मृत्यु
बैशाख ३०, २०८१ आइतबार