भूकम्प प्रभावित पाँच जिल्लाका लागि पहिलो किस्ता अन्तर्गत १ अर्ब ४१ करोड निकासा

 ४ मंसिर, काठमाडौं । सरकारले जाजरकोटसहित पाँच जिल्लाका भूकम्प प्रभावितहरुको अस्थायी आवास बनाउन पहिलो किस्ता अन्तर्गत १ अर्ब ४१ करोड रकम निकासा दिएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत भूकम्प प्रभावितहरुको अस्थायी आवास निर्माणका लागि पहिलो किस्ताको रकम निकासा भएको हो । 

उक्त रकम सम्बन्धित जिल्ला प्रशासन कार्यालयमातहत पठाइएको गृहमन्त्रालयले जनाएको छ । उक्त आज निकासा भएको हो । भूकम्पबाट प्रभावितलाई अस्थायी आवास निर्माण अनुदान दिने कार्यविधि, २०८० जारी भएको छ । संघीय सरकारले भूकम्प प्रभावितलाई अनुदान दिने प्रतिघरधुरी ५० हजार रुपैयाँमध्ये पहिलो किस्ता सोमबार नै निकासा गर्न दिइएको थियो । 

रकम निकासा गर्न उपप्रधानमन्त्री एवं गृहमन्त्री नारायणकाजी श्रेष्ठले प्राधिकरणलाई निर्देशन दिएपछि रकम जिल्ला प्रशासान कार्यालयको खातामा पठाइएको बताइएको छ । प्राधिकरणका अनुसार जाजरकोट र रुकुम पश्चिमका लागि ५०–५० करोड, बझाङका लागि २५ करोड, बाजुराका लागि १४ करोड र सल्यानका लागि दुई करोड गरी जम्मा एक अर्ब ४१ करोड निकासा भएको हो । 

प्राधिकरणले निकासाबारेको बोधार्थ गृह मन्त्रालयमा पठाएको जनाएको छ । उक्त रकम स्थानीय तहमा तुरुन्तै पठाउन र प्रभावकारी कार्यसम्पादन गर्न सम्बन्धित जिल्ला प्रशासन कार्यालयलाई परिपत्र समेत गरिसकिएको छ । भूकम्प प्रभावितले स्थानीय तहमा गएर अनुसूचीअनुसारको निवेदन दिएलगत्तै पहिलो किस्ता २५ हजार रुपैयाँ पाउने प्रबन्ध गरिएको छ । साथै, निर्माण सम्पन्न भएपछि दोस्रो किस्ता २५ हजार रुपैयाँ निकासा हुनेछ ।