प्रधानमन्त्री सहायता कोषमा १८ करोड ८० लाख जम्मा

११ मंसिर, काठमाडौं । प्रधानमन्त्री दैवी प्रकोप सहायता कोषमा हालसम्म १८ करोड ८० लाख ११ हजार १८७ रुपैयाँ जम्मा भएको छ । भूकम्प ग्एपछि जाजरकोट र पश्चिम रुकुममा आर्थिक सहयोग घोषणा गर्नेहरुको संख्या धेरै भएपनि कोषमा रकम जम्मा गर्नेको संख्या भने थोरै देखिएको छ । 

प्रधानमन्त्री तथा मन्त्रिपरिषद्को कार्यालयका अनुसार गएको कात्तिक १८ देखि मंसिर १० गतेसम्म विभिन्न संघसंस्था र व्यक्तिले कोषमा उक्त रकम जम्मा गरेका हुन् । कोषमा हालसम्म ७१ भन्दा बढी संघसंस्था र व्यक्तिले रकम जम्मा गरिसकेका छन् ।

कात्तिक १७ गते जाजरकोटको रामीडाँडा केन्द्रविन्दु भएर ६.४ म्याग्निच्युडको भूकम्प गएको थियो । भूकम्पका कारण जाजरकोट, रुकुम पश्चिमलगायत १३ जिल्लामा ६२ हजारभन्दा बढी घरमा क्षति भएको थियो ।

भूकम्पबाट ठूलो जनधनको क्षति भएपछि सरकारले प्रभावितको सहयोगका निम्ति कोषमा रकम जम्मा गर्न सर्वसाधारणलाई अनुरोध गरेको थियो । त्यसपछि कोषमा पौने १९ करोड रुपैयाँ जम्मा भएको हो ।