असहाय र जेष्ठ नागरिकको अभिभावक बन्दै दमक नगरपालिका

१४ मंसिर, झापा । दमक नगरपालिकाले  जेष्ठ नागरिक ( ९० बर्ष माथि र पूर्ण रुपमा अशक्त भएका फरक क्षमताका) नगरवासीहरुलाई घरघरमा गई चिकित्सक सहितको टोलीले प्रत्येक तीन महिनामा स्वास्थ्य परीक्षण गर्नुका साथै बिरामीको अवस्था र आवश्यकता हेरी आवश्यक सामाग्रीहरु प्रदान गरिरहेको जनाएको छ । दमक नगरपालिकामा नगर प्रमुखको कार्यकक्षमा भएको पत्रकारहरुसँगको संक्षिप्त छलफलमा दमक नगरपालिकाका प्रमुख रामकुमार थापाले उक्त कुरा बताएका हुन् ।

दमक नगरपालिका अन्तर्गत रहेको महिला विकास शाखाले जिम्मेवारी लिई सञ्चालन गरिरहेको उक्त स्वास्थ्य कार्यक्रम नगरकै एक उत्कृष्ट कार्यक्रम बन्दै गएको र यसले ज्येष्ठ नागरिक र फरक क्षमता भएका व्यक्तिहरूको सिधै नगरपालिकासँग पहुँच बढ्नुका साथै स्वास्थ्यकर्मीहरु समेत हरेक वडामा पुग्न थालेको प्रती आम दमकबासीले खुशी व्यक्त गर्न थालेको पाइएको छ ।

दमक नगरपालिकाका नगर प्रमुख रामकुमार थापाले बताए अनुसार नगरपालिकाले पहिलो चरणमा १२ जना फरक क्षमता भएका नागरिकहरुलाई विभिन्न सामाग्रीहरु बितरण गरिएको छ । जसमा बेबि चियर, वाकर, ह्विल चियर, तथा बेड बितरण गरिएको र यस कार्यले सिंगो नगरकै गरिमा र छवि बढाएकोले दोश्रो चरणमा ११ थान ह्विल चियर, १ थान बेबी चियर, १ थान एयर म्याट र १ थान ट्वाईलेट चियर वितरण गर्न लागिएको मेयर थापाले बताएका छन् ।

दमक नगरपालिकाको सर्वेक्षण अनुसार हालसम्म दुई सय दुई जना फरक क्षमता भएका व्यक्तिहरु र  ९० बर्ष माथिका दुई  सय दुई जना ज्येष्ठ नागरिकहरू पालिका भित्र बसोबास गर्ने भएकोले सबै ४०४ जनालाई नै नगरपालिकाले नियमित रुपमा सहयोग पुर्याउने कार्यक्रम रहेको नगर प्रमुख थापाको कथन रहेको छ । यसैगरी नगर भित्र रहेका गरिव तथा असहायहरुलाई खाद्यान्न सहयोग समेत गरिरहेको छलफलमा जानकारी गराइएको थियो ।

दमक नगरकै गहनाको रुपमा रहेको दमक अस्पतालको  अवस्था र सेवा प्रवाहका विषयमा पत्रकारहरुले राखेको प्रश्नमा नगरप्रमुख थापाले अबको दुई महिनामा दमक अस्पतालको अवस्थामा आमूल परिवर्तन भएको देख्न सक्नुहुनेछ भनेर आश्वस्त पारेका थिए ।

छलफलका क्रममा नगर उपप्रमुख रेगिना भट्टराई प्रसाईले नगरपालिकाले पूर्वाधार विकास सँगसँगै जनताका रोग र शोकमा समेत उत्तिकै जिम्मेवार भएर सहयोग गरिरहेको बताउँदै यसलाई निरन्तरता दिने नगरपालिकाको कार्ययोजना रहेको समेत बताएकी छन् । 

नगर उपप्रमुख प्रसाईले हाल नगरपालिको आफ्नो सेवा क्षेत्रभित्र ज्येष्ठ नागरिक र फरक क्षमता भएका नागरिकहरूलाई एम्बुलेन्स फ्रि सर्भिस सञ्चालन गरिरहेको भन्दै आगामी दिनमा वडामै उनीहरूको उपचारको व्यवस्था मिलाउने बताएकी छन् ।

उनले दमक सेफ हाउसलाई अझ बढी प्रभावकारी बनाउने भन्दै हालसम्म दमक नगरपालिकाले दुई सयभन्दा बढीको उद्धार उपचार र पुनःस्थापना गरी सकेको बताएकी छन् । यसले “घर घरमा नगर–जनजनमा नगर“ भन्ने नारालाई सार्थक बनाउन थप वल पुगेको देखिएको छ ।