दिएको निर्देशन अनुसार सचिवहरुले काम नगर्दा जनताको सरकार र दलप्रतिको भरोसा टुट्योः  प्रधानमन्त्री

२० मंसिर, काठमाडौं । प्रधानमन्त्री पुष्पकमल दाहाल प्रचण्डले सरकारका सचिवहरूले निर्देशन अनुसार काम नगरेको बताएका छन् । उनले दिएको निर्देशन अनुसार काम नभएकाले परिणाम निराशा जनक रहेको बताएका छन् । यसका लागि पुराना ऐन संशोधन गरी दीर्घकालीन समस्या समाधानमा सरकार रहेको प्रधानमन्त्री प्रचण्डले बताए ।

बुधबार ललितपुरमा नेपालको अर्थतन्त्र र शासकीय सुधार विषयक अन्तरक्रिया कार्यक्रममा उनले सोचेजस्तो शासकीय सुधारको काम गर्न नसकिएको भन्दै अब सरकारको ध्यान समग्र शासकीय प्रणाली सुधारमा केन्द्रित हुने बताए । आफूले पहिलो पटक सचिवहरूलाई दिएको निर्देशनको परिणाम निराशा जनक रहेको भन्दै प्रधानमन्त्री प्रचण्डले समस्या समाधानका उपाय खोज्नैपर्ने बताए ।

उनले भने, ‘सोचेजस्तो शासकीय सुधारको काम गर्न सकिएन । अब खाली प्रशासकीय मात्रै होइन । समग्र शासकीय प्रणालीमा नै सुधार गर्ने कुरामा हामी छलफल गरेका छौं ।’ प्रधानमन्त्री प्रचण्डले शासकीय सुधार आयोग निर्माण गरेर यसको समग्र समीक्षा गर्ने र अगाडि जाने प्रक्रियातिर लागेको भन्दै सेवा प्रवाहको क्षेत्रमा साना–साना कामहरूमा सुधार गरेर अनि ठूला–ठूला कामहरूलाई प्रायोटाइज गरेर जान जरुरी रहेको बताए । 

प्रधानमन्त्री प्रचण्डले २०७९ पुस २९ गते सरकारका सचिवहरुसँग बैठक गरी ३० बुँदे निर्देशन दिएका थिए । आफूले दिएको सोही निर्देशन स्मरण गर्दै प्रधानमन्त्री प्रचण्डले तत्काल जनतालाई सेवा प्रवाह गर्न र जनतामा उत्साह आउने गरी परिणाममुखी काम गर्न मातहतका सबै निकायलाई निर्देशनसमेत दिए । जनताले प्रत्यक्ष रुपमा आफूलाई सेवा प्राप्त भएको अनुभूत नगरेमा सरकार, राजनीतिक दल र कर्मचारीतन्त्रप्रति जनताको भरोसा कमजोर हुँदै जानेतर्फ उनले ध्यानाकर्षण गराए । 

‘सेवा प्रवाहको क्षेत्रमा हामीले ससाना कामको सुधार गरी ठूल्ठूला कामहरूको टार्जेट गरी  अलि कंक्रिटाइज गर्नु जरुरी छ’, प्रधानमन्त्रीले भने, ‘जनताले प्रत्यक्ष रूपमा सेवा प्रवाह भएको अनुभूत गरेनन् भने सरकार, राजनीतिक दल र कर्मचारी तन्त्रप्रति जनताको भरोसा कमजोर हुँदै जाने र विश्वास टुट्दै जाने हुन्छ । त्यस कारण सेवा प्रवाहमा तत्काल सुधार गरी जनतालाई कसरी सुविधा दिन सकिन्छ भन्नेमा सरकार  गम्भीर भएको छ ।’