देश बचाउन एमालेलाई बहुमत दिनुपर्योः ओली

२० मंसिर, गुल्मी । नेकपा एमालेका अध्यक्ष केपी शर्मा ओलीले जनतासँग बहुमत मागेका छ् । उनले एमालेलाई सरकारबाट हटाएर देशलाई दुर्दशामा पुर्याइएको भन्दै एमालेबाहेक अरुले यो देश बनाउन नसक्ने भएकाले बहुमत दिनुपर्ने बताएका छन् ।  

एमालेको समृद्धिका लागि संकल्प यात्रा अन्तर्गत गुल्मीको मुसिकोटमा आयोजित सभामा उनले सरकारबाट एमाले बाहिर भयो भने २ वर्षभित्र देश कंगाल हुँदोरहेछ, देश बर्बाद हुँदैछ भन्दै त्यसबाट जोगाउन एमालेको एकल बहुमत चाहिने बताए । 

ओलीले देश अत्यन्त अप्ठ्यारो अवस्थामा रहेको बताए । राष्ट्रियता, आर्थिक हिसाबले नाजुक अवस्थामा देश रहेको बताए । अर्थतन्त्र ध्वस्त भइरहेकोले अहिले पहिलो चौमासिकमै कर्मचारीलाई तलब खुवाउन राष्ट्र ऋण उठाउनुपर्ने अवस्था देशमा आएको उनको भनाइ छ । 

रोजगारीका अवसरहरू गुमेकाले, उद्योगधन्दा बन्द हुँदै गएकाले, नयाँ उद्योग नखुलेकोले देश अत्यन्त अप्ठ्यारो अवस्थामा छ’, उनले भने, ’हामी व्यापार घाटामा छौं । खाली आयात गर्ने, निर्यात गर्ने कुनै सामान उत्पादन गर्दैनौं । देशमा भ्रष्टाचार व्याप्त छ । कमिसन तन्त्र र तस्करी व्याप्त छ । यी सबै कुराहरूलाई फेर्न अब हामीले ढिलो गर्नु हुँदैन ।’

अध्यक्ष ओलीले भूकम्पपीडितका लागि सरकारबाट पर्याप्त काम नभएको समेत आरोप लगाए । ’हाम्रो सुझाव सरकारलाई छ, भूकम्प पीडितहरुको सकेसम्म छिटो व्यवस्थापन गरियोस्, पुनर्निर्माण गर्ने र उहाँहरूलाई पुनः बसोबास गराउने काम अविलम्ब सरकारले गरोस, उनले भने ।