लचक नीति : राष्ट्र बैंकको मध्यमार्गी नीतिले आन्तरिक अर्थतन्त्र उफ्रिन थाल्ला ?
भेषराज पोखरेल
मंसिर २६, २०८० मंगलबार ७:४९:४५
बैंकहरुको ब्याजमा भएको वृद्धि तथा धितोपत्र बजार यथास्थिति र घरजग्गा कारोबारमा सुस्तता, आन्तरिक अर्थतन्त्र कमजोर बनिरहँदा राष्ट्र बैंकले मध्यमार्गी नीतिसहित प्रथम त्रैमासिक मौद्रिक नीति सार्वजनिक गरेको छ । नीतिगत तथा बैंक दर घटाएको राष्ट्र बैंकले सार्वजनिक गरेको मौद्रिक नीतिको प्रथम समीक्षामा सेयर धितो कर्जा र घरजग्गा ऋणको सीमा पनि बढाएको छ । नीतिगत तथा बैंक दरमा कमी गरेर राष्ट्र बैकले ब्याजदरमा कमी आउने अपेक्षा गरेको छ ।
यी नीतिगत व्यवस्थाले ब्याजदरमा कमी गर्ने आशा त गर्न सकिन्छ तर अर्थतन्त्र ज्यादै सुस्त चलिरहेकाले अनिश्चितता भइरहने देखाएर ब्याजदर घटाउन बैंकहरु तयार हुन कठिन छ । अहिले बैंकहरुमा पर्याप्त मात्रामा तरलता रहेको छ तर ऋण लगानी गर्न सकेका छैनन् । बैंकहरु सबल भएर मात्रै अर्थतन्त्र सबल हुन कठिन छ । अर्थतन्त्र चलायमान भए बैंक सबल बन्ने हो तर बैंक तथा वित्तीय संस्थाहरुमा तरलता थुप्रियो, लगानी हुन सकेन भने उद्योग र व्यापारको विकास हुन सक्दैन । अहिले नेपालमा त्यही भएको छ । बैंक तथा वित्तीय संस्थामा तरलता बढिरहेको छ तर लगानी बढ्न सकेको छैन । राष्ट्र बैंकको केही लचिलो नयाँ नीतिले ब्याजदर घटेर अर्थतन्त्र सक्रियताको बाटोमा जान सक्छ भन्न कठिन छ ।
राष्ट्र बैंकले सार्वजनिक गरेको मौद्रिक नीतिको समीक्षा अनुसार बैंकदर शून्य दशमलव ५ प्रतिशत र नीतिगत दर एक प्रतिशतले घटाएको छ । राष्ट्र बैंकले मुद्रास्फीतिलाई केन्द्रमा राखेर त्यसलाई प्रभाव पार्ने विभिन्न स्थितिको विश्लेषण गरेर, शोधनान्तर स्थिति र निजी क्षेत्रमा गइरहेको कर्जाको अवस्थालाई हेरेर बेंक र नितिगत दरमा हेरफेर गरेको बताएको छ । राष्ट्र बैंकले हाल कायम रहेको ७ दशमलव ५ प्रतिशतको बैंकदरलाई ७ प्रतिशतमा झारेको छ भने ६ दशमलव ५ बाट ५ दशमलव ५ प्रतिशतमा झारेको छ । अर्को, निक्षेप संकलन बोलकबोल दर ४ दशमलव ५ प्रतिशत रहेकोमा ३ प्रतिशतमा झारेको छ ।
निजी क्षेत्रमा जाने कर्जा घटिरहेकाले ब्याजदर घटाउन यस्तो व्यवस्था गरेको राष्ट्र बैंकले बताएको छ । सो बंैकले निक्षेप संकलन बोलकबोल दर ४ दशमलव ५ प्रतिशत हुँदा बजारबाट पैसा तानेको छ । राष्ट्र बैंकले बजारबाट ७० अर्ब रुपैयाँ उठाइसकेको छ । त्रैमासिक मौद्रिक समीक्षा अनुसार ५० लाखभन्दा बढी सेयर धितो कर्जाको जोखिम भार १ सय ५० प्रतिशतबाट १ सय २५ प्रतिशतमा झारेको छ । ५० लाखसम्मको आवास कर्जामा मासिक किस्ता र आम्दानीको अनुपात ६० प्रतिशत कायम गरेको बताइएको छ ।
राष्ट्र बैंकले यी नीति अवलम्बन गर्दा बैंक तथा वित्तीय संस्थाको ब्याज घट््ने आँकलन गरेको छ । योभन्दा पहिलेका नीतिगत निर्णयपछि राष्ट्र बैंकले ब्याज घटाउन निर्देशन दिए पनि बैंक तथा वित्तीय संस्थाहरुले ब्याज घटाउनुको सट्टा बढाएका थिए । अहिलेको यो नीतिगत निर्णयले ब्याज घटाउँछन् भन्ने कुनै निश्चित छैन । ब्याज घटेन भने यसले अर्थतन्त्रमा खासै केही प्रभाव पार्नेछैन । केही सीमित व्यक्ति तथा कम्पनीहरुलाई थोरै मात्र लाभ मिल्नेछ । अर्थतन्त्रको यही पक्ष मात्रै सक्रिय नबनाउने कारक होइन, अन्य धेरै पक्षले काम गरिरहेका छन् । माग पक्ष, आपूर्ति, आन्तरिक उत्पादन, त्यसको दिगोपना, सरकारी खर्च, त्यसको अवस्थाजस्ता अनेकौं कुराले नेपालको अर्थतन्त्रमा प्रभाव पारिरहेका छन् ।
पछिल्लो समय मागमा अत्यन्तै ठूलो कमी आएको छ । यसको कारण आन्तरिक उत्पादन नहुनु जसले गर्दा आमसर्वसाधारणको आयमा कमी आएको छ । उनीहरुको एकातिर आयमा असर पर्नु, अर्को, उपभोग्य सामग्री महँगिँदै जानुले सामग्रीको उपभोगमा कटौती गर्ने अवस्था आएको हो । अर्को पक्ष अहिलेसम्मको अवस्थालाई हेर्दा युवाहरु कामका लागि विदेशिने तथा पढ्न जाने युवाहरुको संख्या दैनिक रुपमा बढिरहेको छ ।
उनीहरु विदेश जाँदा नेपालमा उपभोग्य सामग्रीहरुको खपतमा गम्भीर असर परिरहेको छ । सामान्य रुपमा आन्तरिक उत्पादन बढ्न सकेको छैन । परम्परागत खेतीकृषि तथा अन्य उत्पादनमा ह्रास आइरहेको छ । नेपालमा हुने औद्योगिक उत्पादनको माग नहुनाले उत्पादकहरुले आफ्ना उत्पादन नै कटौती गरिरहेका छन् । अर्को, आयातीत सामग्रीको खपत पनि स्वात्तै घट्न गएको छ । यसले नेपालमा हुने विदेशी उपभोग्य सामग्रीको आयात पनि घटेर गएको छ । यसले अर्थतन्त्रमा निराशा उत्पन्न गराएको छ ।
मौद्रिक नीतिमा घरजग्गा खरिद ऋणको जोखिम भार तथा सेयर धितो कर्जामा लचक नीति लिए पनि यी दुवै क्षेत्र यही अवस्थामा फैलन सक्ने छैनन् । अन्य आर्थिक कृयाकलाप कमजोर हुने, शहरी क्षेत्रमा जग्गाको मूल्य बढ्ने तथा आमनागरिकको क्रयशक्ति घट्दा सर्वसाधारणले घरजग्गा किन्न सक्ने अवस्था छैन । यो नीतिले पनि केही सक्षम नागरिकलाई लाभ भए पनि आमसर्वसाधारणलाई लाभ हुन सक्ने छैन । अर्को, सेयर धितो कर्जाको सीमा त बढाइएको छ, यसले केही रुपमा भए पनि सेयरबजारमा सक्रियता आउला भन्ने आशा गर्न सकिन्छ । मौद्रिक नीति सार्वजनिक गर्दा केही आशा जागे पनि समग्र अर्थतन्त्र चलायमान नहुँदा यो क्षेत्र अस्थिर नै छ ।
साना लगानीकर्ताले सेयर धितो राखेर सेयर खरिद गर्ने कुरा भएन, ठूला लगानीकर्ताले यस्तो ऋण पाए पनि उनीहरुले सेयर खरिद, बिक्री बढाइरहन कठिन छ । आइतबार सेयर कारोबारमा केही सुधारका संकेत देखिए पनि त्यो अवस्था टिकिरहन कठिन नै देखिएको छ । त्यसो गर्दा यो परिदृश्यमा नेपालको धितोपत्र बजार अस्थिर नै भइरहने अवस्था छ । मौद्रिक नीतिले तत्कालको परिवेशलाई हेरेर नीति अवलम्बन गर्ने हो तर पनि नेपालमा वास्तविक समस्या एकातिर काम अर्कातिर गरिनाले प्रतिफल पाउन कठिन हन्छ । अर्को, वित्त नीति व्यवस्थित र सही कार्यान्वयन नहुने हो भने अन्य नीतिले ठूलो प्रभाव पर्न कठिन छ । सरकारले वित्त पक्षमा गम्भीरता देखाउन सकेको देखिन्न । यस्तो अवस्थामा मौद्रिक नीतिको प्रतिफल सामान्य नै हुने हो ।
भेषराज पोखरेल
नेपालबहस डटकमका नियमित स्तम्भकार भेष राज पोखरेल वरिष्ठ पत्रकार हुन् । विगत २५ वर्षदेखि अर्थ राजनीतिक धारमा कलम चलाउँदै आएका पोखरेलले कान्तिपुर दैनिकमा २० वर्ष भन्दा बढी समय भाषा सम्पादकका रुपमा काम गरेका छन् । स्वतन्त्र लेखकका रुपमा समेत विभिन्न दैनिक पत्रपत्रिकाहरुमा लेखहरू लेख्दै आएका पोखरेलले दुई वर्ष नेपाल तारा डटकमको सम्पादकको रुपमा काम गरेको अनुभव पनि छ ।
लेखकबाट थपपूर्वराजा ज्ञानेन्द्र सडकमा आउने मुहूर्त
बैशाख १६, २०८१ आइतबार
राष्ट्रिय सम्पत्ति जलिरहेको छ, देशको वास्तविकता ख्याल नगरी कस्ता योजना आउने होलान् ?
बैशाख १५, २०८१ शनिबार
लोकतन्त्र दिवसको सान्दर्भिकता
बैशाख ११, २०८१ मंगलबार
तीनदिने अनुसन्धनात्मक लेखन कार्यशाला तथा तालिम सुरु
नेपालबहस संवाददाता
बैशाख १४, २०८१ शुक्रबार
तीन करोड मानिसको स्वास्थ्यमाथि खेलबाड गर्ने चौधरी समूहलाई २ लाखमा उन्मुक्ति
नेपालबहस संवाददाता
बैशाख १४, २०८१ शुक्रबार
इलाम - २ मा कांग्रेस पछि पर्यो , एमालेका सुहाङले लिए अग्रता
बैशाख १६, २०८१ आइतबार
यसै आर्थिक वर्षदेखि बङ्गलादेशमा विद्युत् निर्यात हुन्छ : प्रधानमन्त्री प्रचण्ड
बैशाख १६, २०८१ आइतबार
बझाङमा १५९३ मतसहित एमालेको अग्रता कायमै, कांग्रेसलाई माओवादीले उछिन्यो
बैशाख १६, २०८१ आइतबार
काठमाडौंमा महिलाको हत्या गरेर फरार व्यक्ति ९ वर्षपछि पक्राउ
बैशाख १६, २०८१ आइतबार
बझाङ: एमाले १४०४, कांग्रेस ७६९, माओ ४०१ र एस ३६९ मत
बैशाख १६, २०८१ आइतबार
इलाम: कांग्रेस, १६५८, एमाले १६३०, स्वतन्त्र ४३० र रास्वपाः ३०८ मत
बैशाख १६, २०८१ आइतबार