अर्थमन्त्रीद्वारा ६ जना सहसचिवको जिम्मेवारी हेरफेर

२६ मंसिर, काठमाडौं । अर्थमन्त्री प्रकाशशरण महतले अर्थ मन्त्रालयका ६ जना सहसचिवहरुको जिम्मेवारी बदलेका छन् । मन्त्रीस्तरीय निर्णयअनुसार मन्त्रालयका सहसचिवहरुको जिम्मेवारी हेरफेर गरिएको हो । तीन महिनाभन्दा बढी जिम्मेवारी नतोकिएका महेश आचार्य, राजेश्वर ज्ञवाली, शम्भु प्रसाद मरासिनी, महेश बराल, अमृत लम्साल र पार्वती शर्माको पदस्थापन तथा जिम्मेवारी हेरफेर भएको हो ।
 
प्रशासन महाशाखाको जिम्मेवारी आचार्यलाई दिइएको छ भने राजेश्वर ज्ञवालीलाई महालेखा नियन्त्रकको कार्यालयमा पठाइएको छ । त्यसैगरी महालेखा नियन्त्रकको कार्यालयका शम्भु प्रसाद मरासिनीलाई भन्सार जाँच पास परीक्षण कार्यालयको प्रमुख भन्सार परीक्षण प्रशासकमा पठाइएको छ । सहसचिव महेश बराललाई कर प्रणाली सुधार सम्बन्धी उच्चस्तरीय सुझाव समितिको जिम्मेवारी दिइएको छ ।

 सहसचिव अमृत लम्साललाई बबरमहलस्थित मध्यमस्तरीय करदाता कार्यालयको प्रमुख कर प्रशासकमा र पार्वती शर्मालाई आन्तरिक राजश्व विभागको उपमहानिर्देशकमा पठाइएको मन्त्रालयले जनाएको छ । अर्थमन्त्री महतले मन्पिरिषदमा प्रस्ताव लगेपछि प्रशासन महाशाखालाई सहसचिवहरूको सरुवा तथा पदस्थापन गर्न प्रशासन महाशाखालाई निर्देशनका थिए ।