प्रदर्शन भइरहेको ठाउँमा मन्त्री जानु र प्रहरीले संयम नअपनाउनु दुवैका कमजोरी देखिएः गृहमन्त्री श्रेष्ठ

१६ पुस, काठमाडौं । बालकुमारीमा गत शुक्रबार युवाहरूले प्रदर्शन गरिरहेको ठाउँमा भौतिक पूर्वाधार तथा यातायातमन्त्री प्रकाश ज्वालाको उपस्थितिले प्रदर्शनलाई उग्र बनाउन उत्प्रेरकको काम गरेको उपप्रधानमन्त्री तथा गृहमन्त्री नारायणकाजी श्रेष्ठले बताएका छन् । उनले बालकुमारी घटनामा सुरक्षा कमजोरी भएको स्वीकार गरेका छन् । 

यसमा ईपीएस कार्यालय प्रमुखको भूमिका पनि सकारात्मक नभएको उनको भनाइ छ । संसदीय समितिको बैठकमा घटनाबारे जानकारी दिँदै मन्त्री श्रेष्ठले फिल्डमा खटिएका प्रहरीको कमाण्डर, भौतिक पूर्वाधार मन्त्री प्रकाश ज्वालाका पीएसओ र इपीएस कार्यालय प्रमुखको भूमिकामा त्रुटि भएको आफूहरुको प्रारम्भिक बुझाइ रहेको बताए ।

गृहमन्त्री श्रेष्ठले ईपीएस कार्यालय प्रमुखको भूमिका सकरात्मक नदेखिएको र ’रियाक्टिभ’ भएको पाइएको बताए । उनले भौतिक पूर्वाधार तथा यतायातमन्त्रीको पीएसओले जिम्मेवारी पूरा नगरेको पनि बताए । ’पीएसओले बाटो चेक गर्छ । कन्ट्रोल रुपमबाट भएको कुरा पनि वाकिटकीमा सुनिरहेको हुन्छ । तर मन्त्री आर्मीको सेक्युरिटी गार्ड र पीएसओ लिएर जानुभएको छ । त्यसले यो घटनालाई अर्को मोडतिर जानका लागि क्याटलिस्ट (उत्प्रेरक)को भूमिका खेलेको छ,’ उनले भने ।

मन्त्रीको सवारी त्यो क्षेत्रमा पुग्नुभन्दा पहिले प्रहरीले लाठीचार्ज गर्ने, टियर ग्यास हान्ने र ईपीएस कार्यालयमा क्षति हुन नदिन प्रयासमा रहेको तर मन्त्रीको सवारी हुँदा प्रदर्शन उग्र बनेको गृहमन्त्रीको भनाइ थियो । मन्त्री ज्वाला गाडीभन्दा बाहिर निस्किएपछि प्रदर्शनकारीसँग सवालजवाफ गर्दा पनि प्रदर्शन उग्र भएको हो कि भन्ने लागेको श्रेष्ठले बताए । त्यहाँ विवाद भएपछि सेनाको गार्डले अगाडि लगेको देखिएको गृहमन्त्रीले जानकारी दिए ।

त्यो घटना हुनुमा तीन कुराले भूमिका खेलेको पनि उनले बताए । पहिलो मुलुकमा बेरोजगार युवाको अवस्था, दोस्रोमा भौतिक पूर्वाधार तथा यातायतमन्त्री प्रकाश ज्वालाको तनावग्रस्त त्यस क्षेत्रमा उपस्थिति र त्यस क्षेत्रमा कार्यरत सुरक्षाकर्मी र प्रदर्शनकारी बीचको अवस्था रहेको उनले बताए ।

मन्त्री ज्वाला ग्वार्को नजिकैको एक पार्टी प्यालेसमा आयोजित एकीकृत समाजवादीको कार्यक्रममा सहभागी भएर मन्त्रालय जानका लागि निस्किएको अवस्थामा त्यो घटना भएको गृहमन्त्रीको भनाइ थियो । ’मन्त्रीको गाडी आएको छ र घेराबन्दीमा परेको छ भनियो । त्यसपछि फिल्ड कमाण्डर त्यो दिशामा जान खोजेको देखिन्छ । त्यसै क्रममा गोली प्रहार भएको देखिन्छ । एकजनाको गोलीद्वारा लडेपछि पाटन हस्पिटल लगेको र अर्कोको छातिमा डाम देखिन्छ । टियर ग्यासले नजिकबाट लागेको हो कि हतियारले लागेको हो कि भन्ने देखिन्छ । बाँकी छानबिनले पुष्टि होला,’ उनले भने, ’यसैबीचमा मन्त्रीको गाडी जलेको देखिन्छ ।’