शिक्षा र खेलकुद एक सिक्काका दुई पाटाः राष्ट्रपति

१७ पुस, काठमाडौं । राष्ट्रपति रामचन्द्र पौडेलले खेलकुद शिक्षालाई राज्यले प्राथमिकता दिनुपर्ने बताएका छन् । मंगलबार काठमाडौंमा राष्ट्रपति रनिङ शिल्ड प्रतियोगिताको उद्घाटन गर्दै उनले खेलकुद विकासको अभिन्न अंग रहेको बताए । 

उनले अतिरिक्त क्रियाकलाप र खेलकुद शिक्षालाई पूर्ण बनाउन र विद्यार्थीमा सीप, ज्ञान, सामाजिक मूल्यको आर्जन तथा कार्य तत्परता विकास गर्ने माध्यम भएको बताए । शिक्षा र खेलकुद एक सिक्काका दुई पाटा भएको भन्दै उनले कक्षा कोठाको शिक्षाले विद्यार्थीको आँखा र मस्तिष्कमात्रै खुलाउने र खेलकुदले मस्तिष्क, हातखुट्टा र मनलाई क्रियाशील र अनुशासित बनाउने बताए । 

पौडेलले पुस्तक र विद्यालयको सीमाको सिकाइले मात्र आजका विद्यार्थीलाई पूर्ण बनाउन नसक्ने बताए । परिवार, समाज र परिवेश समावेशबाट सिक्ने तथा गरिखाने पुस्तकविहीन शिक्षामा उनको जोड छ । विद्यार्थीहरूको खेलकुदमा संलग्नता समृद्धि, सफलता, समाज निर्माणको आधार भएको राष्ट्रपति पौडेलको भनाइ छ ।