बजारमा आवश्यकताभन्दा धेरै पैसा भएको भन्दै नेपाल राष्ट्र बैंकले चार दिनमै तान्यो ७५ अर्ब २५ करोड निक्षेप

१९ पुस, काठमाडौं । नेपाल राष्ट्र बैंकले बजारबाट पैसा तान्ने क्रमलाई निरन्तरता दिइरहेको छ । बजारमा पैसा धेरै भएपछि बजारबाट पैसा तानेको हो । राष्ट्र बैंकले गएको चार दिनमा बजारबाट ७५ अर्ब २५ करोड रुपैयाँ तानेको हो ।

चारदिनमा तानिएको रकममध्ये ५५ अर्ब २५ करोड रुपैयाँ तानिसेकेको छ भने बाँकी २० अर्ब रुपैयाँ आज बिहीबार तान्नका लागि राष्ट्र बैंकले सूचना जारी गरेको छ । राष्ट्र बैंकले पुस १६, १७, १८ र १९ गते गरेर सवा ७५ अर्ब रुपैयाँ बजारबाट तानिसकेको छ ।

हालको नीतिगत व्यवस्थाअनुसार अन्तर बैंक दर तीन प्रतिशतभन्दा कम रहँदा राष्ट्र बैंकले बजारबाट पैसा तान्नु पर्छ । अहिले अन्तरबैंक दर २.८० प्रतिशत हाराहारीमा छ । बुधबारको बोलकबोल अनुसार निक्षेप संकलनको भारित औसत ब्याजदर ३ प्रतिशत कायम भएको राष्ट्र बैंकले जनाएको छ । 

सोही दिन बैंक तथा वित्तीय संस्थाले अधिकतम ३.११ प्रतिशत र न्यूनतम २.५९ प्रतिशत ब्याजदर प्रस्ताव गरेका थिए । आज बिहीबार २० अर्ब रकम तानिदैछ ।