राष्ट्र बैंकले ४ हजार मूल्य बराबरका प्रदेशको नाम अंकित सिक्का निकाल्ने

२२ पुस, काठमाडौं । नेपाल राष्ट्र बैंकले प्रदेश अनुसार सात प्रदेशको नाममा स्मारिका सिक्का निकाल्ने भएको छ । राष्ट्र बैंकको मुद्रा व्यवस्थापन विभाग अन्तर्गतको टक्सार महाशाखाले यस्ता सिक्का निकाल्न लागेको जनाएको छ । प्रदेशमा रहेका धार्मिक, ऐतिहासिक र सांस्कृतिक सम्पदा तथा साहित्यिक धरोहरमध्ये एक÷एक छनोट गरी स्मारिका सिक्का निकाल्ने योजना टक्सार विभागको छ । 

यसका लागि ५ वटा प्रदेशको स्थलगत भ्रमण गरिसकेको र वाग्मतीमा अध्ययन भइरहेको बताइएको छ । अध्ययन सकिएपछि महाशाखाले सिक्का निकाल्ने प्रस्ताव कार्य व्यवस्था समिति हुँदै संचालक समितिमा लानेछ । अन्तिममा सरकारबाट स्वीकृत भएपछि सिक्का निकालिनेछ । प्रदेश स्मारिका सिक्का चालू आर्थिक वर्षको अन्तिमसम्म निकाल्ने योजना रहेको बताइएको छ ।