सूर्योदय सहकारीद्वारा आयोजित रक्तदान कार्यक्रमबाट ४२ युनिट रगत संकलन

२४ पुस, स्याङ्जा । जिल्लाकै सबैभन्दा धेरै शेयर सङ्ख्या रहेको सूर्योदय बचत तथा ऋण सहकारीद्वारा २५ औं वर्षगाँठको अवसरमा रक्तदान कार्यक्रम आयोजना गरेको छ । नेपाल रेडक्रस सोसाइटी स्याङ्जा शाखाको प्राविधिक सहयोगमा सोमबार स्याङ्जा सदरमुकाममा आयोजित रक्तदान कार्यक्रममा ४२ युनिट रगत सङ्कलन भएको हो । 

जिल्लाका सामुदायिक तथा सरकारी अस्पतालहरुमा रगत अभाव हुन नदिनका लागि कार्यक्रम रक्तदान कार्यक्रम आयोजना गरिएको संस्थाका सचिव मिरा मल्लले जानकारी दिइन् । सचिव मल्ल भनिन्, ‘जिल्लाका स्वास्थ्य संस्थामा रगत अभावलाई कमी गर्न रक्तदान कार्यक्रम राखेका हौं । रगत अभावले कोही पनि अकालमा ज्यान गुमाउन नपरोस् ।’ एक युनिट रगतका लागि पोखरा जानुपर्ने बाध्यता रहेको बताउँदै जिल्लामा महिना–महिनामा रक्तदान कार्यक्रम गर्नु पर्ने उनको भनाई छ । 

सहकारीले २५ औं स्थापना दिवस तथा रजतजयन्तीको अवसरमा २५ वटा कार्यक्रम घोषण गरेका छन् । जसमध्ये आँधीखोला गाउँपालिका २ स्थित गुरुकुल वेद आश्रम खाद्यान्न वितरण, आँधीखोला गाउँपालिका ४ सेपत र पुतलीबजार नगरपालिका ३ बाडखोलामा पालिका स्तरीय वित्तीय साक्षरता कार्यक्रम, विरुवा गाउँपालिका ८ भुरुङचौकी माविमा सरसफाई कार्यक्रम, चापाकोट नगरपालिकाको साँखरमामा शैक्षिक सामग्री वितरण कार्यक्रम सम्पन्न गरिसकेका छन् । संस्थाले आगामी पुस २५ गते विविध कार्यक्रम गर्दै रजतजयन्ती विशेष समारोह मनाइँदैछ 
।
संस्थाको कूल सम्पत्ति ७३ करोड २३ लाख २ हजार ८९० रहेको छ । जसमध्ये शेयर पूँजी ७ करोड ६६ लाख ५ हजार ५००, जगेडा कोष ५ करोड, ५७ लाख ७९ हजार ८३३, कूल निक्षेप (बचत) ४९ करोड ६४ लाख ५१ हजार ८६६ र ५५ करोड ८३ लाख ८५ हजार १६५ रूपैयाँ लगानी रहेको छ । 

हालको तरलता रकम १० करोड ९४ लाख ५६ हजार ५२३ रूपैयाँ र विभिन्न कोषहरूमा २ करोड ४४ लाख ६७ हजार २८८ रहेको छ । संस्थामा हाल १ हजार ८८१ जना ऋणी रहेका छन् । संस्थाले करिब २० हजार जना प्रत्यक्ष र परोक्ष रुपमा लाभान्वित छन् । 

पुतलीबजारको बाडखोलामा केन्द्रीय कार्यालय रहेको सूर्योदयको चापाकोट नगरपालिका, आँधीखोला गाउँपालिका र विरुवा गाउँपालिकाका ५ वटा सेवा केन्द्रबाट सेवा दिँदै आइरहेको छन् । एसियाली ऋण महासंघ (अक्कु) र नेपाल बचत तथा ऋण सहकारी केन्द्रीय संघ (नेफस्कून)ले सञ्चालनमा ल्याएको एक्सेस ब्राण्डीङ कार्यक्रममा २०६९ वैशाख ११ देखि सहभागी भई कार्य सम्पादन गर्दै आएका छन् । 

२०५५ पुस २५ गते सूर्योदय क्लब सम्बद्ध ३ जना युवाहरूको अगुवाइमा सूर्योदय बचत समूहको स्थापना भई २०५७ सालबाट तत्कालिन सहकारी ऐन २०४८ अनुसार २०५७ भाद्र २२ गते जिल्ला सहकारीमा दर्ता भई सहकारीको औपचारिक कारोबार सुरु गरिएको थियो । 

२०५५ साल पुस २५ गते तत्कालीन सूर्योदय युवा क्लबको अगुवाइमा सूर्योदय बचत समूहको रुपमा स्थापना भएको र २०५७ सालमा सूर्योदय बचत तथा ऋण सहकारी संस्था लि.को रुपमा स्थापना भएको संस्थामा हाल १० हजार ७४० शेयर सदस्य र करिब २ हजार ८ सय बाल बचत रहेका छन् । शेयर सदस्यहरूको समृद्धिका लागि सीप, प्रतिभा, स्थानीयस्तरमा उपलब्ध श्रोत र साधनको अधिकतम परिचालनको वातावरण निर्माण गरी शेयर सदस्यहरूलाई आत्मनिर्भर एवं स्वावलम्बी बनाउने लक्ष्य रहेको छ ।