वालिङ साना शहरी खानेपानीमा कर्मचारीद्वारा आर्थिक हिनामिना, प्रतिवेदन नहुँदा अधिवेशन प्रभावित

पुस २६, स्याङ्जा । वालिङ साना शहरी खानेपानी तथा सरसफाई उपभोक्ता संस्थाका कर्मचारीहरूले आर्थिक हिनामिना गरेको भन्दै छानबिन समिति गठन गरिएको छ । संस्थाका सहायक लेखापाल र लेखा तथा नगद बिलिङ शाखामा कार्यरत दुई जना कर्मचारीद्वारा आर्थिक हिनामिना गरेको पुष्टि भएपछि समिति गठन गरिएको हो । दुवै जना कर्मचारीहरूलाई अहिले कार्यालयले बिदामा राखेको छ । छानबिन प्रभावित नहोस् भन्दै कर्मचारीलाई बिदामा राखिएको हो । 

आर्थिक वर्ष २०७९/०८० को लेखापरीक्षणको क्रममा दुवै जना कर्मचारीको संलग्नतामा करिब ११ लाख रूपैयाँभन्दा बढी हिनामिना गरेको प्रारम्भिक छानबिनबाट पुष्टि भएको छ । वालिङ साना शहरी खानेपानी उपभोक्ता संस्थाका उपाध्यक्ष एवं छानबिन समितिका संयोजक रोशन कुँवरका अनुसार २०७९ साउन १ गतेदेखि मंसिर २ गतेसम्मको कार्यालय भौचार र बैंक भौचर हेर्दा करिब ११ लाख बढी हिनामिना भएको देखिएको प्रमाण भेटिएको छ । संयोजक कुँवरले भने, ‘प्रारम्भिक छानबिनको क्रममै छौं । हिनामिना रकमको अनुपात अझै बढ्न सक्छ ।’ उनका अनुसार कार्यालय प्रमुखकाे संलग्नता बारेमा पनि छानबिन भइरहेको छ । 

कार्यालयद्वारा समयमै आर्थिक प्रतिवेदन नबुझाउँदा गत पुस २० गतेलाई डाकिएको चौथो साधारणसभा एवं दोस्रो अधिवेशन अनिश्चित बनेको छ । संस्थाका अध्यक्ष विद्या श्रेष्ठले आर्थिक प्रतिवेदन नआउँदासम्म साधारणसभा नहुने बताए । ‘संस्थाको आर्थिक प्रतिवेदन आएको छैन, आर्थिक प्रतिवेदनबिना साधारणसभा र अधिवेशन हुनै सक्दैन, उनले भने । आर्थिक हिनामिनाको विषयबारे प्रश्न गर्दा छानबिन भइरहेको विषय भन्दै अध्यक्ष श्रेष्ठ खासै बोल्न चाहेनन् । 

संस्थाका कार्यालय प्रमुख देव बोगटीले छानबिनमा रहेका कर्मचारीहरू बिदामा बसेको जानकारी दिए । प्रमुख बोगटीका अनुसार एक जना बिरामी र अर्का घरायसी कामले बिदामा बसेका छन् । तर उनीहरूलाई निलम्बन वा बिदा भन्ने बारे पनि समितिमा फरक फरक मत रहेका छन् । यता, बिदामा बसेका भनिएका कर्मचारीहरूद्वारा हिनामिना रकम बैंकमा जम्मा गरेको पाइएको छ । उनीहरूद्वारा करिब ३ लाख ५० हजार रकम जम्मा गरिएको पाइएको  छ ।  

संस्थाले मासिक रुपमा करिब १२ लाख रूपैयाँ आम्दानी गर्छन् । जसमध्ये महसुलबाट ९ लाख ५० हजार र धारा जडान लगायत अन्य शीर्षकबाट करिब १ लाख ५० हजार रहेको छ । हाल करिब १० करोड बराबरको परियोजना चलिरहेको छ । पुस मसान्तमा सक्नुपर्ने परियोजना ठेकेदारका ढिलाइका करण तीन महिनालाई म्याद थप गरेको छ । 

संस्थाको नगर विकास कोषसँग करिब ३ करोड साँवा र ३१ लाख ब्याज गरी ३ करोड ३१ लाखभन्दा बढी ऋण रहेको छ । यही आर्थिक वर्षको अन्त्यसम्म पुरै ब्याज भुक्तानी गर्ने लक्ष्य रहेतापनि त्यहाँको व्यवस्थापकीय र प्रशासनिक अस्तव्यस्तले सम्भावना कमै देखिन्छ । 

२०५९ सालमा स्थापना भएको वालिङ साना सहरी खानेपानी उपभोक्ता संस्थामा हाल २ हजार ८७५ जना सदस्य छन् । त्रियासी, रामबाच्छा, मिर्दी, वालिङ र भकुण्डेमा संस्थाले दैनिक खानेपानी वितरण गर्दै आइरहेका छन् । दैनिक २३ लाख लिटर पिउने पानी खपत हुँदै आएको छन् । संस्थामा हाल विभिन्न तहमा १७ जना कर्मचारी कार्यरत छन् ।