सरकारले निर्माण व्यवसायीलाई तिर्न बाँकी ६ अर्ब ३० करोडको आजबाटै भुक्तानी सुरु: प्रधानमन्त्री

२९ पुस, काठमाडौं । सरकारले निर्माण व्यवसायीहरूलाई भुक्तानी गर्नुपर्ने रकम तत्काल भुक्तानी गर्ने भएको छ । आज आइतबारदेखि नै उनीहरुको भुक्तानी सुरु भएको प्रधानमन्त्री पुष्पकमल दाहाल प्रचण्डले जनाएका छन् । उनकै निर्देशनमा ठकेदारहरको बाँकी रहकम दिन लागिएको हो । 

आइतबार दिउँसो प्रधानमन्त्री पुष्पकमल दाहाल प्रचण्डको कार्यकक्ष सिंहदरबारमा भएको छलफलपछि निर्माण व्यवसायीहरूले भुक्तानी पाउनुपर्ने रकम निकासाको प्रक्रिया आइतबारबाटै अगाडि बढाउने निर्णय भएको हो । प्रधानमन्त्रीले रकम निकास गर्ने विषयमा छलफल गर्न अर्थमन्त्री प्रकाशशरण महत, भौतिक योजना तथा यातायातमन्त्री प्रकाश ज्वाला, मुख्यसचिव बैकुण्ठ अर्याल, अर्थसचिव डा. कृष्णहरि पुष्कर, भौतिक मन्त्रालयका सचिव केशवकुमार शर्मा, सडक विभागका महानिर्देशक सुशीलबाबु ढकालसहितका लाई बोलाएका थिए । 

छलफलपछि आजै भुक्तानीको प्रक्रिया अगाडि बढाउने निर्णय भएको हो । छलफलमा प्रधानमन्त्रीले निर्माण व्यवसायीको गत आर्थिक वर्षको भुक्तानी गर्न बाँकी १ अर्ब ७१ करोड र चालु आर्थिक वर्षको अहिलेसम्मको दायित्व गरी ६ अर्ब ३० करोड रूपैयाँ तत्काल निकासा गरेर विकास निर्माणका काममा गति दिन अर्थ मन्त्रालयलाई निर्देशन दिएका थिए ।

प्रधानमन्त्रीको निर्देशनपछि भएको छलफलमा अर्थ मन्त्रालयले आजै भुक्तानीको प्रक्रिया अगाडि बढाउने निर्णय भएको जनाएो छ । यो निर्णयसँगै विकास निर्माणका कामले गति लिने र अर्थतन्त्र थप चलायमान हुने अपेक्षा गरिएको प्रधानमन्त्रीको भनाइ छ । निर्माण कम्पनीहरुले लामो समयदेखि सरकारबाट भुक्तानी पाउन सकेका थिएनन् ।