पुरस्कृत हुने बेलामा कारबाहीका लागि मुख्यालय हाजिर !

२ माघ, काठमाडौं । सशस्त्र प्रहरीका एक एसपी पुरस्कृत हुने बेलामा कारबाहीमा परेका छन् । सशस्त्र प्रहरीले माघ ९ गते स्थापना दिवस मनाउने क्रममा गण गुल्म लगायतमा क्रियाशील रहेका मध्यबाट पुरस्कृत गर्ने बेला ती एसपी कारबाहीमा परेका हुन् । 

गणमा भएको अधिक जनशक्ति बिदा छोडेर राशनमा आर्थिक अनियमिता गरेको आरोपमा सशस्त्र प्रहरीका एसपी कमलचन्द्र गैरे मुख्यालय तानिएका छन् । तनहुँको २३ नम्बर गणका गणपति गैरेले ७० प्रतिशत कर्मचारी विदा छोडेको आरोपमा मुख्यालय तानिएका हुन्  ।

त्यसरी बिदा छोडेपछी पोखरा स्थित बाहिनिका डीआईजी कालिदास धौबजीलाइ छानबिन गर्न हेडक्वार्टरले आदेश दिएको थियो । छानबिनका क्रममा नीति भन्दा धेरै विदामा पाइएपछि तानिएको मुख्यालय स्रोतले जनाएको छ ।

उनलाई अब कमन्डमा फिर्ता पठाइने संभावना नरहेको र त्यहाँ जान आईजीपी राजु अर्याललाई सोर्स लगाउन एउटा समूह गृहमन्त्रालय समेत पुगेको छ । माघ १५ बाट गणपतिहरूको सरुवा हुने भएकाले त्यसअघि नै त्यहाँ जानका लागि गृहमन्त्रालयबाट लाइन मिलाउन एउटा टोली गृहमन्त्रीको सचिवालयमा पुगेको छ । मन्त्रालयका कोही कर्मचारीले भनेको आईजीपी अर्यालले नटेर्ने भएकाले मन्त्रीकै सोर्स प्रयोग गर्न दौडधूप चलिरहेको छ ।

स्रोतका अनुसार विदा छोड्ने मात्र होइन उनले आफू अवकाश जान लागेकाले गणमा कमसल खाना खुवाएको आरोप समेत छ । ‘गणमा कार्यरत कर्मचारी प्रती उदासीन रहने , मातहतको पिर मर्का नबुझ्ने र रासनमा मात्र गिद्धे नजर लगाउने काम भयो’, गणमा कार्यरत एक सिनियर अधिकृतले भने । उनी यही माघमा अनिवार्य अवकाश हुँदैछ । अवकाशको बेलामा उनलाई कारबाहीको लागि भन्दै तानिएको हो ।  

यसैगरी प्रहरी महानिरीक्षक मातहत रहने बाघ भैरव गुल्म पति डीएसपी रजनी थापाले पनि नजानिदो पाराले विदा छाडेको गुनासो मुख्यालयमा पुगेको छ । काठमाडौंको शान्ति सुरक्षालाई सहयोग पुग्नेगरी स्थापना गरिएको र फिल्डमा खटाउने प्रयोग गरिने यो गुल्ममा करिब २५० भन्दा बढी जनशक्ति रहेको छ । दैनिक ३० देखि ३५ जना घरायसी विदा बाहेक अन्य ४० देखि ४५ जना विदा छाड्ने गरेको गुल्म स्रोतले जानकारी दिएको छ । आईजीपी अर्यालले डीएसपी थापालाई महिला कमाण्डरको रुपमा त्यहाँ पठाइएको हो ।

यता तराईमा कार्यरत केही कमान्डर समेत कारबाहीमा परेको बुझिएको छ । बिओपी गौरमा कार्यरत डीएसपी अमर लामालाई बाहिनी तानिएको छ । उता नबलपरासी , रुपन्देही र कपिलवस्तुको तस्करी रोकिएको छैन । नवलपरासी गणका गणपती धिरेन्द्र न्यौपानेले मातहत बिओपीसँगको मिलेमतोमा व्यापक तस्करी गराएको आरोप छ । खासगरी भुजहवा, हरपुरबाट दिउँसै तस्करी भएको श्रोतको दाबी छ ।

 यस्तै रुपन्देहिको डन्डा, मझगवा लगाएतको बोर्डर बाट तस्करी  मौलाएको भन्दै सशस्त्र प्रहरी मुख्यालयमा उजुरीका चाङ लाग्ने गरेका छन् । धेरैको उजुरी परिरहेको बेला यसपल्ट नवलपरासीका एसपी पुरस्कृतको सूचीमा रहेका छन् ।