क्रोएसिया पठाइदिने भन्दै ठगी गरेको आरोपमा एकजना पक्राउ

१० माघ, काठमाडौं । वैदेशिक रोजगारीका लागि क्रोएसिया पठाइदिने भन्दै रकम ठगी गर्ने एकजना प्रहरी फन्दामा परेका छन । काठमाडौं उपत्यका अपराध अनुसन्धान कार्यालय मिनभवनको टोलीले काठमाडौं वसन्तपुरका ३५ वर्षीय विशाल श्रेष्ठलाई पक्राउ गरेको जानकारी दिए ।

उनीविरुद्ध रकम ठगी गरेको उजुरी परेको थियो । सोही उजुरीका आधारमा उपत्यका अपराध अनुसन्धान कार्यालयको टोलीले श्रेष्ठलाई मंगलबार बागबजारबाट पक्राउ गरेको काठमाडौं उपत्यका अपराध अनुसन्धान कार्यालय मिनभवनका प्रवक्ता एवं सूचना अधिकारी प्रहरी उपरीक्षक रविन्द्र रेग्मीले जनाएको छ ।

क्रोएसियामा रोजगारीका लागि जान ७ लाख रूपैयाँ लागत लाग्ने भन्दै पीडितबाट १ लाख ४ हजार रूपैयाँ लिएर उनी फरार थिए ।

थप अनुसन्धान तथा कारवाहीका लागि उनलाई वैदेशिक रोजगार विभाग ताहाचाल पठाइएको प्रहरीले जनाएको छ ।