सरकारी वकिललाई अपुरो प्रतिवेदन बुझाउँदै प्रहरी

१४ माघ, काठमाडौं । प्रहरीले भिजिट भिसा प्रकरणको अनुसन्धान प्रतिवेदन जिल्ला सरकारी वकिलको कार्यालयमा बुझाउने तयारी गरेको छ । अनुसन्धान सुरु गरेको ५७ दिन हुँदैछ । भरसक आइतबार प्रतिवेदनलाई अन्तिम रुप दिएर प्रतिवेदन बुझाउने तयारीमा प्रहरी छ । 

भिजिट भिसा सेटिङको आरोप लागेका त्रिभुवन अन्तर्राष्ट्रिय विमानस्थल अध्यागमन कार्यालयका ८ जना अधिकृतलाई भने प्रहरीले समाउन सकेको छैन । उनीहरू विरुद्ध अदालतबाट पक्राउ पुजी जारी भइसकेको छ ।  

अनुसन्धानको म्याद सकिन लागेकाले प्रहरीले पक्राउ पुर्जी जारी भएकालाई फरार सूचीमा राखेर प्रतिवेदन बुझाउने भएको छ । प्रहरीले अध्यागमन अधिकृत नरवीर खड्कालाई पक्राउ गरेर यस प्रकरणको अनुसन्धान थालेको थियो । खड्काको बयानलाई आधार बनाएर अन्य ७ जना विरुद्ध पनि पक्राउ पुर्जी जारी गरिएको हो । भिजिट भिसाको सेटिङमा संलग्न रहेको आरोपमा अध्यागमनका ९ जना अधिकृतविरुद्ध मुद्दा चलाउने राय प्रहरीले दिएको छ ।

यसअघि अध्यागमनमा कार्यरत रहेका अधिकृतहरू कुशल बराल, शैलेन्द्र ढकाल, विमल पौडेल, विष्णु अर्याल, विकास डंगोल, पिताम्बर रिमाल र सुजन फागोलाई प्रहरीले समाउन सकेको छैन् । उनीहरू हाल कहाँ कहाँ कार्यरत भनेर खोज्ने काम भइरहेको प्रहरीले जनाएको छ । प्रहरीले भिजिट भिसाको सेटिङमा संलग्न १० जनालाई पक्राउ गरेको छ । प्रहरीसँग प्रतिवेदन बुझाउन म्याद अब तीन दिन बाँकी छ । 

यहि विषयमा शुक्रबार अध्यागमन कुटपिटको घटना पनि भएको छ । कर्मचारीले प्रहरीको गल्ती देखाएका छन भने प्रहरीले कर्मचारीकाे गल्ती देखाएका छन् । विमानस्थल प्रहरी प्रमुख डीआईजी अर्जुनचन्द ठुकरीले प्रहरीलाई हेप्दै मोक्तानले नै पहिले मुख र हात छाडेको दाबी गरेका छन् । कर्मचारीहरूले भिजिट भिसा सेटिङमा दैनिक १ करोडसम्म उठाउने गरेको प्रहरीको दाबी छ ।

अनुसन्धानमा अध्यागमनका कर्मचारीले युवायुवतीसँग पैसा लिएर भिजिट भिसामार्फत विदेश पठाउने गरेको तथ्य फेला परेको थियो । त्यसमा संलग्न केही अधिकृतमाथि मुद्दा दर्ता भएर पक्राउ पुर्जीसमेत जारी भइसकेको छ । त्यसपछि प्रहरीले अध्यागमनका कर्मचारीमाथि निगरानी बढाउन थालेको हो ।

कर्मचारीले पुस १८ गते काम रोकेर गृहमन्त्री नारायणकाजी श्रेष्ठलाई ज्ञापनपत्र बुझाउँदै प्रहरीले अनावश्यक रूपमा दुःख दिएको गुनासो गरेका थिए । त्यसपछि माघ ९ मा गृह मन्त्रालयले भिजिट भिसामा विदेश प्रस्थान गर्ने नीतिलाई लचिलो बनाउँदै नयाँ कार्यविधि जारी गरेको छ । यसअघि २०७८ चैत २६ गते सचिवस्तरको निर्णय खारेज गरी गृहमन्त्री श्रेष्ठले कार्यविधि जारी गरेका हुन् । पुरानो कार्यविधिमा भिजिट भिसामा विदेश जाने प्रावधानमा कडाइ गर्दा पैसाको चलखेल हुने गरेको गुनासो आएको थियो ।

नक्कली कागजात बनाएर भिजिट भिसामा हुने मानव तस्करीमा संलग्न भएको आरोप लागेका अध्यागमन विभागका ७ जना कर्मचारी नै डेढ महिनादेखि फरार छन् । उनीहरूलाई प्रतिवेदनमा फरार भएको देखाइएको छ । 

अध्यागमनका अधिकृत नरवीर खड्का पक्राउ परेपछि बाँकी ७ जना अध्यागमनका कर्मचारी फरार भएका खुलेको हो । काठमाडौं उपत्यका अपराध अनुसन्धान कार्यालयको टोलीले अध्यागमन अधिकृत नरवीर खड्कालाई मंसिर २६ गते घुस लिँदै गरेको बेला रंगेहात पक्राउ गरेको थियो। भिजिट भिसामा सेटिङ मिलाए बापत लिएको २ लाख रूपैयाँ लिँदै गरेको अवस्थामा प्रहरीले उनलाई पक्राउ गरेको थियो।