अख्तियारले छानविन थालेपछि समाजकल्याण परिषदकी उपाध्यक्ष मोनिकाले दिइन राजीनामा

१५ माघ, काठमाडौं । समाजकल्याण परिषदकी उपाध्यक्ष मोनिका भट्टराई अधिकारीले पदबाट राजीनामा दिएकी छन् । उनले केही समय अगाडि नै पदबाट राजीनामा दिए पनि महिला, बालबालिका तथा ज्येष्ठ नागरिक मन्त्री सुरेन्द्रराज आचार्यले आज मात्र स्वीकृत गरेका छन् । मोनिकाले यसअघि मौखिक रुपमा राजीनामा दिएको बताउँदै आएकी थिइन । आइतबार लिखित रुपमा मन्त्री समक्ष राजीनामा बुझाएपछि स्वीकृत भएको हो ।  

उनले अमेरिकी स्थायी बसोवास अनुमतिपत्र (पीआर) लिएको विषयमा अख्तियार दुरुपयोग अनुसन्धान आयोगले छानविन सुरु गरेपछि उनले राजीनामा बुझाएकी हुन् । सासू उमा रेग्मी मन्त्री हुँदा सत्ता र शक्तिको दुरुपयोग गरेर परिषदमा नियुक्ति पाएकी भट्टराईले अमेरिकी पीआर लिएको भेटिएपछि अख्तियारमा उजुरी परेको थियो ।  
 
परिषद अध्यक्षसमेत रहेका महिला, बालबालिका तथा ज्येष्ठ नागरिक मन्त्री सुरेन्द्रराज आचार्यले उपाध्यक्ष मोनिकाले दिएको राजीनामा स्वीकृत गरेको मन्त्रालयले जानकारी दिएको छ । मोनिका उपाध्यक्ष नियुक्त हुनुभन्दा अघि देखि नै पीआर लिएको उजुरी परेको थियो ।

पीआर भएको व्यक्तिलाई नियमअनुसार नियुक्ति दिन नमिल्ने कानुनी व्यवस्था छ । तर,नेपाली कांग्रेसकी नेता उमा रेग्मी मन्त्री हुँदा आफ्नै बुहारी मोनिकालाई नियम विपरीत उपाध्यक्षमा नियुक्त गरेकी थिइन् । ०७८ मा नेपाली कांग्रेसका सभापति शेरबहादुर देउवा नेतृत्वको गठबन्धन सरकारमा कांग्रेस नेता उमा महिला, बालबालिका तथा ज्येष्ठ नागरिक मन्त्री थिइन् । 

रेग्मीले चार वर्षे कार्यकालका लागि बुहारी मोनिकालाई उपाध्यक्षमा सिफारिस गरेपछि ०७८ मंसिर २ गतेको मन्त्रिपरिषद बैठकले निर्णय गरेको थियो । मोनिका उमाकी छोरा विजय अधिकारीकी पत्नी हुन् । नियम विपरीत बुहारीलाई नै उपाध्यक्ष नियुक्त गरेको भन्दै त्यसबेला मन्त्री रेग्मीको आलोचना भएको थियो । 

स्वार्थ बाझिने र पीआर भएकालाई सरकारी नियुक्ति दिन नमिल्ने कानुनी व्यवस्था छ । सार्वजनिक पदमा नियुक्ति गर्दा निजामती सेवा ऐन २०४९ लाई पनि आधार मानिने गरिएको छ । यस ऐनको दफा ४९ को (ख) मा स्थायी आवास अनुमति लिन नहुने विषय समावेश छ । कर्मचारीले स्थायी आवास अनुमति लिन वा त्यस्तो अनुमति प्राप्त गर्नको लागि आवेदन दिनु हुँदैन भन्ने व्यवस्था छ । 

पीआर लिएको लगायतका उजुरी मन्त्रालयदेखि अख्तियारसम्म परेपछि उपाध्यक्ष भट्टराईले पदबाटै राजीनामाको बाटो लिएकी हुन्  । भट्टराईले भने आफ्नो विवाह अमेरिकी नागरिकसँग भएका आधारमा पीआर पाएको बताएकी छन् । उनले पीआर रद्दको प्रक्रिया अघि बढाएको उनको दावी थियो ।