एक वर्षभित्र २० अर्ब पूँजी पुर्याउन पुनर्बीमा कम्पनीलाई बीमा प्राधिकरणको निर्देशन

१७ माघ, काठमाडौं । नेपाल बीमा प्राधिकरणले पुनर्बीमा कम्पनीहरूको न्युनतम चुक्ता पूँजी बढाएर २० अर्ब पुर्याएको छ । प्राधिकरणले आगामी एक वर्षभित्र २० अर्ब पूँजी पुर्याउन निर्देशन पनि दिएको छ । बुधबार बिहान बसेको बीमा प्राधिकरण सञ्चालक समितिको बैठकले पुनर्बीमा कम्पनीको न्युनतम चुक्ता पूँजी २० अर्ब पुर्याउने निर्णय गरेको हो । 

बैठकले पुर्नबीमा कम्पनीहरूको न्युनतम चुक्ता पूँजी २० अर्ब पुर्याउने निर्णयसँग पूँजी बढाउन १ वर्ष र पूँजी बढाउने योजना पेस गर्न १५ दिनको समय दिएको छ । कम्पनीहरूले नै पूँजी बढाउने योजना पेस गर्नुपर्नेछ । कम्पनीहरूले योजना पेश गरेपछि मात्रै हकप्रद शेयर लगायतका विकल्पमाथि प्राधिकरणले छलफल गर्ने भएको छ । पुनर्बीमा जोखिम बहन गर्नुपर्ने भएकोले कम्पनीको पूँजीको आधार बलियो बनाउन पूँजी बढाउन लागिएको प्राधिकरणको भनाइ छ । 

हाल नेपालमा २ वटा पुनर्बीमा कम्पनी सञ्चालनमा रहेका छन् । नेपाल सरकारसमेत स्वामित्व रहेको नेपाल पुनर्बीमा कम्पनी र निजी क्षेत्रको लगानीमा स्थापना भएको हिमालयन रिइन्स्योरेन्स कम्पनी छन्। सरकार सम्मिलित कम्पनीको चुक्ता पूँजी १२ अर्ब ८१ करोड रहेको छ भने निजी क्षेत्रको हिमालयन रिइन्स्योरेन्स कम्पनीको चुक्ता पूँजी १० अर्ब रहेको छ ।